(सर्मिला बोगटी)
काठमाडौं । कैलाली, बारा, झापा र कास्कीका छुट्टाछुट्टै स्थानबाट अबैध लागूऔषधसहित पाँच जना लागूऔषध कारोबारी पक्राउ परेका छन् ।
प्रहरीका अनुसार कैलाली धनगढी उपमहानगरपालिका-४ बसपार्कबाट कंचनपुर बेलौरी नगरपालिका-७ बस्ने २० वर्षीय विबेक सुनारलाई नियन्त्रित लागूऔषध ३ सय ६ ट्याब्लेट नाईट्रोभेट सहित शनिबार दिउँसो प्रहरीले पक्राउ गरेको छ ।
जिल्ला प्रहरी कार्यालय कैलाली र अस्थाई प्रहरी पोष्ट बसपार्कबाट खटिएको प्रहरीले जाँच गर्दा उक्त लागूऔषध सहित फेला पारी उनलाई पक्राउ गरेको हो ।
यसैगरी बारा करैयामाई गाउँपालिका-८ ईटहर भेलाहीबाट अवैध लागूऔषध १ केजी अफिम सहित जितपुर सिमरा उपमहानगरपालिका-१६ टागियाबस्ती बस्ने २७ वर्षीय राजकुमार योन्जन तामाङलाई शनिबार दिउँसो प्रहरीले पक्राउ गरेको छ ।
तामाङ सवार ना.३५ प ८२२ नम्बरको मोटरसाइकल जिल्ला प्रहरी कार्यालय बाराबाट खटिएको प्रहरीले जाँच गर्दा उक्त लागू औषध सहित फेला पारी उनलाई पक्राउ गरेको हो ।
यसैगरी झापा बुद्धशान्ती गाउँपालिका-३ पुलचोकबाट अवैध लागूऔषध ब्राउनसुगर जस्तो देखिने लिसाईलो पदार्थ ५ ग्राम सहित सोही ठाउँ बस्ने २६ वर्षीय सुबास लिम्बुलाई शनिबार दिउँसो प्रहरीले पक्राउ गरेको छ । ईलाका प्रहरी कार्यालय बुधबारेबाट खटिएको प्रहरीले उनलाई उक्त लागूऔषध सहित फेला पारी पक्राउ गरेको हो ।
यसैगरी कास्की पोखरा महानगरपालिका-३० पावरहाउस चोकबाट नियन्त्रित लागूऔषध १ सय एम्पुल फेनरागन, ९९ एम्पुल नुर्फिन र १ सय एम्पुल डाईजेपाम सहित २ जनालाई शनिबार साँझ प्रहरीले पक्राउ गरेको छ ।
पक्राउ पर्नेहरुमा रुपन्देही सिद्धार्थ नगरपालिका-३ बस्ने २० वर्षीय चुडामणि खतिवडा र १८ वर्षीय किशोर रहेका छन् । वडा प्रहरी कार्यालय गगनगौडाबाट खटिएको प्रहरीले काठमाडौंबाट पोखरातर्फ जाँदै गरेको ग.१ ख ५६३० नम्बरको बस जाँच उक्त लागूऔषध सहित फेला पारी उनीहरुलाई पक्राउ गरेको हो ।रासस
