(सागर थापा)
दाङमा होली खेल्न हिडेका एक जनाको मोटरसाईकल दुर्घटनामा परि मृत्यु भएको छ । इलाका प्रहरी कार्यालय तुलसीपुरका अनुसार सोमबार साँझ ६ बजेतिर बबई गाउँपालिका वडा नं. ३ हंसपुरको पिसियो चोकमा मोटरसाइकल दुर्घटना हुँदा घाइते भएका बबई गाउँपालिका वडा नं. ५ निवासी १९ वर्षीय गोविन्द पुनको मृत्यु भएको हो ।
होली खेल्न रा ४ प १४४३ नम्बरको मोटरसाइकलमा सवार रहेका उनी दुर्घटना हुँदा गम्भीर घाईते भएका थिए । उनको राप्ती प्रादेशिक अस्पताल तुलसीपुरमा उपचारको क्रममा मृत्यु भएको हो ।
ईलाका प्रहरी कार्यालय तुलसीपुरका प्रहरी प्रमुख डिएसपी शिवबहादुर सिंहले दुर्घटनामा परी बबई ५ का २७ वर्षीय ध्रुब घर्ती र बबई ४ का २५ वर्षीय देवराज रजाली गम्भीर घाइते भएका छन् ।
घाईते मध्ये घर्तीको तुलसीपुरमा सामान्य उपचार पछि थप उपचारपछि कोहलपुर रेफर गरिएको छ। भने रजालीलाई थप उपचारकालागि हेलिकप्टरमार्फत काठमाडौं लैजाने गरि परिवारले तयारी गरेका छन् ।
तीव्र गतिका कारण दुर्घटना भएको प्रहरीले बताएको छ । मोटरसाईकल कसले चलाएको थियो, भन्ने पनि खुल्न सकेको छैन् । घटनाका बारेमा अनुसन्धान भइरहेको प्रहरीले जनाएको छ ।
