ABC (क्राईमबिट)
दाङ । असल अभिभावकत्वको कमीका कारण अहिले थुप्रै बालबालिकाहरु गलत बाटोमा गइरहेका छन् । आमा बुवाको माया, साथ र संरक्षणको अभावका कारण बालबालिकाहरु अञ्जानमा अपराधतर्फ उन्मुख भइरहेका छन् । समाजमा हुने विभिन्न प्रकृतिका अपराधहरुमा बालबालिका उमेर समूह मुछिदै गएको घटनाले प्रहरीलाईसमेत हैरान बनाएको छ ।
जिल्ला प्रहरी कार्यालय दाङको तथ्यांकले लागूऔषध, चोरी र यौनजन्य अपराधहरुमा बालबालिकाको संलग्नता बढेको देखाउँछ । बालबालिकाबाट हुने अपराधलाई कानुनले बालबिज्याइँ भनेर परिभाषा गरेको छ । अहिले जिल्ला प्रहरी कार्यालयमा यस्ता बालबिज्याइँका घटना बढेर गएका छन् । तथ्यांकले बितेको तीन वर्षमा बालबिज्याइँका घटनामा ६५ बालबालिका पक्राउ परेका छन् । जसमा लागूऔषधका सात, चोरीका २१, यौनजन्य गतिविधिमा संलग्न छजना बालबालिका पक्राउ परेका छन् । अधिकांश १४-१८ उमेर समूहका बालबालिकाहरु आपराधिक गतिविधिमा संलग्न हुने गरेको दाङ प्रहरीले जनाएको छ । जिल्ला प्रहरी कार्यालय दाङका प्रहरी प्रबक्ता डिएसपी मुकुन्द रिजालले अभिभावकत्वको कमीका कारण बालबालिकाहरु अपराधतर्फ उन्मुख भइरहेको बताउनुहुन्छ ।
