(महेन्द्र प्रताप
सिंह)
बाँके । गर्मी बढेसँगै बाँकेको सदरमुकाम नेपालगन्ज सहित तराईका जिल्लामा लामखुट्टेको प्रकोप ह्वात्तै बढेको छ । गर्मी मौसम शुरु हुने समयमा लामखुट्टेको प्रकोप बढ्ने भए पनि नेपालगन्ज उपमहानगरपालिकाले समयमा औषधि नछर्किँदा लामखुट्टेको प्रकोप ह्वात्तै बढेको हो ।
नेपालगन्ज उपमहानगरपालिकाले समयमै लामखुट्टे मार्ने औषधि नछर्किँदा मानिसमा लामखुट्टेको टोकाइबाट हुने विभिन्न प्रकारका रोग लाग्न सक्ने सम्भावना बढदै गएको नेपालगन्ज वडा नम्बर २ का स्थानीयवासी पवन गुप्ताले बताए ।
सरसफाइ व्यवस्थापन र लामखुट्टेको न्यूनीकरणमा उपमहानगरपालिका अन्तर्गतका सबै वडा एकजुट भएर लाग्नुपर्ने अर्का स्थानीयवासी वडा नम्बर २ का शिव सोनीले बताए । उचित सरसफाइ हुन नसक्दा नेपालगन्ज बजार क्षेत्र तथा टोलबस्तीमा यतिबेला लामखुट्टेको प्रकोप बढेको छ ।
स्थानीय बासिन्दाले यस वर्ष समयमै नेपालगन्ज उपहानगरपालिकाले प्रभावकारी औषधि खरिद गरेर छर्नुपर्ने माग गरेका छन् ।
नेपालगन्जको बजार क्षेत्र र टोल बस्तीमा नियमित सरसफाइ नहुँदा लामखुट्टेको प्रकोप बढेको स्थानीयवासीको गुनासो छ । दैनिकी रुपमा सरसफाइ गर्नुपर्ने उनीहरुको माग रहेको छ । भने नेपालगन्ज उपमहानगरपालिका वडा कार्यालय २ का वडा अध्यक्ष सुनिल सिंह हमालले उपमहानगरपालिकाले राखेका सरसफाइ कर्मीले नगर क्षेत्रको नियमित सरसफाई गरिरहेका बताए ।
साथै उनले आफ्नो नगर क्षेत्रको लामखुट्टेको बढी प्रकोप हुने स्थानमा तत्काल औषधि छर्किने बताए । उप महानगरपालिकाले सकेको गर्दै गर्दा पनि लामखुट्टेको प्रकोप रोक्न सबै नगरवासी पनि सजग भएर लाग्नुपर्ने उनको भनाइ छ ।
