(सबी अधिकारी)
दाङ । लमही जेसिजले लमहीमा रहेका २ ओटा छुट्टाछुट्टै अस्पतालमा ३० वटा रिफिल गरिएका अक्सिजन सिलिण्डर सहयोग गरेको छ । अक्सिजनको अभाबमा कुनैपनि बिरामीले अकालमा ज्यान गुमाउन नपरोस भन्दै सिलिण्डर हस्तान्तरण गरिएको लमही जेसिजका अध्यक्ष दुलमदास चौधरीले बताए ।
देउखुरीका ४ पालिकाले सञ्चालन गरेका रातोडाँडा स्थित कोरोना अस्पतालमा २५ र लमही अस्पतालमा ५ गरि ३० ओटा सिलिण्डर हस्तान्तरण गरिएको हो । अक्सिजनको अभावमा तड्पि तड्पि ज्यान गुमाएका समाचार हरु बाहिरिए सँगै बिरामीको पिरमर्का प्रती लमही जेसिजले चासो देखाएको छ ।
बिरामीलाई थोरै भएपनि राहत मिलोस भन्दै जेसिजका अध्यक्ष दुलमदास चौधरी, महासचिव सुन्दर केसी, कोषाध्यक्ष निर्मला चौधरी, कार्यकारी उपाध्यक्ष मुकेश चौधरी, जनसम्पर्क अधिकारी केशब दिपक शर्मा लगाएतका पदाधिकारीहरु सोमबार अस्पतालमै पुगेर सिलिण्डर सहयोग गरेका हुन । महामारीको समयमा उनिहरुले सबैले सक्दो सहयोग गर्नुपर्ने धारणा राखे ।
लमही नगरपालिकाकि उपप्रमुख देवका बेलबासेको विशेष उपस्थितिमा अक्सिजन सिलिण्डरहरु बितरण गरिएको हो । जेसिजका पुर्ब अध्यक्ष हरु सँगै अन्य पदाधिकारीको आर्थिक सहयोगमा अक्सिजन सिलिण्डर रिफिल गरिएको महासचिव सुन्दर केसिले जनाए ।
कोभिड-१९ ले महामारी रुप लिए लगत्तै पैदल यात्रीको उद्वार सँगै खानाको ब्यबस्था समेत गरेको लमही जेसिजले दोस्रो चरणको सँक्रमणमा सुरुवात देखि नै अक्सिजनको ब्यबस्थापनमा खटिएको छ ।
