(सर्मिला बोगटी)
बर्दिया । जिल्ला प्रहरी कार्यालय मातहतमा रहेका पूर्व प्रहरी र अमर प्रहरीलाई स्वास्थ्य सामाग्री वितरण गरिएको छ । जिल्लामा रहेका अवकास प्राप्त प्रहरीलाई बर्दिया प्रहरी प्रमुख एसपी ईश्वर कार्कीले मातहतमा बोलाएर स्वास्थ्य सामाग्री उपलब्ध गराएका हुन् । जिल्ला प्रहरी कार्यालय प्राप्त स्वास्थ्य सामाग्री र आफ्नै खर्चमा सावुन सर्जिकल माक्स उपलब्ध गराएको प्रहरी निरीक्षक गोपाल पौडेलले बताए ।
कोरोना कहरमा प्रभावित हुन सक्ने, समुदायमा सचेतना फैलाएर कोभिड नियन्त्रण संक्रमण नियन्त्रणमा पुलको काम गर्ने पूर्व र अमर प्रहरीलाई राहत सामाग्री उपलव्ध गराएको प्रहरी उपरीक्षक ईश्वर कार्कीले बताए । ‘पहिलो प्राथामिकतामा बहालवाला प्रहरी कर्मचारीलाई स्वास्थ्य सामाग्री उपलब्ध गराएर उपयोग गर्न कडाई गर्दै स्वास्थ्य सामाग्री समुदायमा बसिरहेका पूर्व सहकर्मीलाई सम्झिएर दिएका हुँ ’उनले भने,‘डिउटीमा खटिएर काम गर्ने प्रहरी र समुदायमा रहेका पूर्व प्रहरीलाई स्वास्थ्य सामाग्री बिहिन नहुन् भन्ने उदेश्य हो ।’
पूर्व प्रहरीहरु समुदायमा स्थापित भएपनि मायाको चिनो स्वरुप स्वास्थ्य सामाग्री उपलब्ध गराएको उनको भनाई छ । ‘उँहाहरुसँग स्वास्थ्य सामाग्री नभएर दिएको होईन’ उनले भने, ‘लामो समयसम्म संगठनमा काम गरेकाले मायाको चिनो स्वरुप उपहार दिएको हो ।’
एक साता अघि देखि मातहतमा रहेका पूर्व सहकर्मीलाई निम्ताएर स्वास्थ्य सामाग्री वितरण गरेको उपरीक्षक कार्कीले जानकारी दिए । उनका अनुसार समुदायमा पूर्व सहकर्मी सहयोगले जिल्लामा लुकेर बसेका बृकृति, विसंगति नियन्त्रणमा सहयोग पुग्ने, वर्तमान प्रहरी र पूर्व प्रहरी बिच सामिप्यतता बढ्ने समेत उनले विश्वास व्यक्त गरे । ‘समाजको आवश्यक्ता जनमैत्री प्रहरी हो’उनले भने,‘प्रहरी संगठनले समुदायमा विश्वास जित्नका लागि पूर्व सहकर्मीले सहयोगी भूमिका निभाउन सक्नु हुन्छ ।’
