(ABC-Sanchar)
दाङ । लमही देउखुरी स्थित राप्ती नदीमा म्याद गुज्रिएका पेय पदार्थलाई व्यापारीले बगाएका छन्। लमही नगरपालिका वडा नं. ६ मध्यनगर स्थित झोलुङ्गे पुलको एउटा किनारमा म्याद नाघेको पेय पदार्थ ठूलो मात्रामा नदीमा बगाएको अवस्थामा फेला परेको वडा सदस्य कृष्ण खत्रीले जानकारी दिएका छन् । आइतबार दिउँसो एउटा पिकअप भ्यानले नदी किनारबाट म्याद नाघेको पेय पदार्थ बगाएको थियो।
नदी किनारमा रातै देखेपछि के रहेछ भनेर हेर्न पुग्दा पेय पदार्थ फालिएको अवस्थामा भेटिकाे वडा सदस्य खत्रीले बताए । पेय पदार्थको एक वर्ष म्याद नाघेको छ। दुई सय पेटी भन्दा बढी पेय पदार्थ नदीमा बगाइएको अवस्थामा भेटिएको हो।
मनकामना फ्रुट एण्ड वेवरेज प्रालि अर्जुनधारा–५ झापामा उत्पादित कोल्ड कोला, फ्रुस र माचो ड्यूको म्याद नाघेको पाइएको छ। कसले फालेको हो भन्नेबारेमा वडा प्रहरी कार्यालय लमहीले अनुसन्धान गर्ने भएको छ। स्थानीयले खबर गरेपछि राप्ती नदी किनारमा पुगेको प्रहरी टोलीले नदी किनारमा तैरिएको अवस्थामा भेटिएको पेय पदार्थलाई किनारमा निकालेर राखेको हो।
