ABC (क्राईमबिट)
बिरगंज । भारतको झुक्याएर लगेर बेचिएका दुई युवतीको उद्धार पर्सा प्रहरीले गरेको छ । साथै, बेचबिखनमा संलग्न दुईलाई पनि प्रहरीले पक्राउ गरेको छ ।
झापा जिल्लाकी एक जना १६ वर्षीया बालिका र १ जना २० वर्षीया युवती गरी २ जनालाई पर्सा प्रहरीले उद्धार गरेको हो । भारतको विहार राज्यस्थित छौँडादानो भन्ने स्थानमा पु¥याई बेचबिखन भइरहेको भन्ने सूचना प्राप्त गरेको पर्सा प्रहरीले मंगलबार भारतीय काउन्टरपार्ट्ससँग समन्वय गरी दुई युवतीको उद्धार गरेको जिल्ला प्रहरी कार्यालय पर्साका प्रवक्ता प्रहरी नायब उपरिक्षक ओम प्रकाश खनालले बताए ।
साथै, उद्धार पश्चात युवतीहरुले दिएको बयानको आधारमा उनीहरुलाई भारत लगेर बेच्ने कार्यमा संलग्न दुई जना महिलालाई प्रहरीले पक्राउ गरेको हो । पक्राउ पर्नेमा झापा जिल्ला विर्तामोड नगरपालिका वडा नं. ९ की २० वर्षीय लक्ष्मी दास र सुनसरी जिल्ला इटहरी उपमहानगरपालिका वडा नं. १२ की १९ वर्षीय खुश्बु विश्वकर्मा रहेका छन् ।
“पर्साको बीरगञ्ज शहरमा पु¥याई अर्केष्ट्रामा आकर्षक तलब हुने काम लगाइदिने” प्रलोभन देखाएर विश्वासमा पारी अभियुक्तहरुले युवतीहरुलाई भारत पु¥याएको अनुसन्धानबाट खुलेको पर्सा प्रहरी प्रवक्ता खनालले बताए । बीरगञ्ज बसपार्कसम्म ल्याई काम गर्ने ठाउँसम्म पु¥याउने भनी झुक्याई युवतीहरुलाई अभियुक्तहरुले भारतको बिहार राज्यको छौँडादानो पु¥याएका थिए । त्यहाँ मोबाइल फोन खोसी एक कोठामा राखी भारतकै अन्य स्थानमा पठाउने तयारी भइरहेको सूचना पाएपछि भारतीय प्रहरीको सहयोगमा उनीहरुलाई उद्धार गरिएको प्रवक्ता खनालले बताए ।
युवतीहरुलाई झुक्याई बेचबिखन गर्ने उद्देश्यले लैजाने कार्यमा संलग्न रहेको आरोपमा पक्राउ परेको दुई जना महिलालाई पर्सा जिल्ला अदालतबाट बुधबार ७ दिनको म्याद थप गरी मानव बेचबिखन कसूरमा अनुसन्धान अगाडि बढाइएको प्रवक्ता प्रहरी नायव उपरिक्षक खनालले बताए । यस्तै, मानव बेचबिखन तथा ओसारपसार कार्यमा संलग्न अन्य तीन जना व्यक्ति फरार रहेकोले खोजतलास भईरहेको उनले बताए ।
