(ABC-Sanchar)
दाङ । दाङमा प्रहरीहरुमा मोटोपनको समस्या देखिन थालेपछि जिल्ला प्रहरी कार्यालय दाङले शारीरिक व्यायम र दैनिक कसरतमा जोड दिएको छ ।
दाङ प्रहरी प्रमुखका रुपमा आएको भोलीपल्टबाट एसपी सुरेश काफ्लेले शारीरिक रूपमा मोटा देखिने प्रहरीकै माथिल्लो तहका सुरक्षा अधिकारीदेखि जवान सबैलाई दैनिक दौडाउन सुरू गरेका हुन । आफू जिल्ला आएको भोलिपल्टदेखि नै बिहान दैनिक रूपमा सबैलाई दौडाउन थालेको एसपी काफ्लेले बताए । मोटा प्रहरी सबैलाई बिहानको दौड अनिवार्य गरिएको उनले कुरा गर्दै भने । शारीरिक रुपमा चुस्त र छरितो हुनुपर्ने नेपाल प्रहरीका कर्मचारीहरुमा मोटोपन बढ्दै गएकोप्रति संगठनभित्रै चासो र चिन्ता बढेकाले आफैबाट यस्तो सुरु गरेको उनले बताए । 
जिल्लाका बिभिन्न स्थानमा कार्यरत मोटा प्रहरीलाई जिल्ला झिकाएर दैनिक दौडाउने योजना रहेको एसपी काफ्लेले बताए । दैनिक अभ्यासले फिट भएपछि ती प्रहरीलाई पुनः सम्बन्धित कार्य क्षेत्रमै खटाइने उनले जानकारी दिए। केही प्रहरीमा अस्वभाविक मोटोपन देखिएको जसले गर्दा राम्रोसँग हिँड्नपनि नसक्ने अवस्था रहेको एसपी काफ्लले बताउछन। ‘जो आँफै राम्रोसँग हिड्न सक्दैनन्,उनीहरुलाई दौडाएर, पिटी खेलाएर फिट पार्ने मेरो योजना हो-उनले थपे । दाङ सरूवा भएर आएको दोस्रो दिनदेखि एसपी दौडिन थालेपछि डिएसपीलगायत सबै शारीरिक रूपमा ‘अनफिट’ प्रहरीहरू दौडिन र व्यायाम गर्न थालेका छन्। डिएसपी मुकुन्द रिजालले ड्यूट्टीमा रहेका प्रहरी बाहेक अरू सबै एक घन्टा दौडिन सुरू गरेको बताए ।
