(सागर थापा)
दाङ । तुलसीपुर इलाका प्रहरी कार्यालय तुलसीपुरले प्रतिबन्धित लागुऔषधको अबैध कारोबार गरेको अभियोगमा दूई जनालाई पक्राउ गरेको छ ।पक्राउ पर्नेमा २८ बर्षीया लक्ष्मी श्रेष्ठ र २१ बर्षीय अरबिन्द्रसिंह ठकुरी रहेको इप्रका तुलसीपुरका प्रहरी प्रमुख डिएसपी श्यामु अर्यालले जानकारी दिए ।श्रेष्ठले तुलसीपुर उपमहानगरपालिका वडा नं. ६ स्थित बाहिनी चोकमा ‘सानो संसार’ नामक खाजा घर होटेल सञ्चालन गर्दै आएकी थिइन । प्रहरीले उनलाई शुक्रबार होटेलबाटै पक्राउ गरेको थियो
नुवाकोट जिल्लाको साबिक मनकामना गाबिस ७ भनारीमा माइती घर रहेकी उनको दश बर्ष पहिले बिहे भएपनि दूई बर्षदेखि श्रीमानसंग सम्बन्ध बिग्रएको हुँदा एक्लै बस्दै आएको भन्ने खुल्न आएको इप्रका तुल्सीपुरले जानकारी दिएको छ ।
त्यस्तै पक्राउ परेका ठकुरी सल्यान जिल्लाको शिद्धकुमाख गाउँपालिका वडा नं. ७ का बासिन्दा हुन । श्रेष्ठ र ठकुरी मिलेर तुलसीपुरमा लामो समयदेखि अबैद्य रुपमा लागु औषधको कारोबार गर्दै आएको प्रहरी प्रबक्ता शर्माले बताए । ठकुरीलाई भने प्रहरीले नेपालगञ्जबाट पक्राउ गरेको थियो ।
तुलसीपुर क्षेत्रमा मुख्य ड्रग्सको अबैध कारोबारी उनीहरु नै रहेको डिएसपी अर्यालले बताए । ‘हामीले पक्राउ गरेका मध्य अधिकाँसले उहाँहरु बाटै ड्रग्सहरु लिने गरेको बयान गरेका छन्,’ डिएसपी अर्यालले भने ‘लागुऔषध कारोबारी केही मानिसहरु पक्राउ परेपछि उहाँहरु भागेर नेपालगञ्ज जानु भएको थियो ।’
श्रेष्ठ र ठकुरीलाई शुक्रबार पक्राउ गरिएको प्रहरीले जानकारी दिएको छ । तर, उनीहरु पक्राउ पर्दा साथबाट कुनैपनि लागु औषध भने फेला नपरेको डिएसपी अर्यालले बताए । हामीले जतिलाई पक्राउ गरेका छौं, ती सबैले श्रेष्ठ र ठकुरीकै नाम लिएपछि पक्राउ गरेका हौं,’ डिएसपी अर्यालले भने ।
