(ABC-Sanchar)
दाङ । लुम्बिनी प्रदेशको राजधानी दाङको भालुवाङ लमही सडक खण्ड मृत्यु मार्गमा परिणत हुँदै जान थालेको छ । सिसहनियाँ देखि लमही सम्मको सडक कालोपत्रे भएर सुधार आए पनि पहरुवा देखि भालुवाङ सम्मको सडक मर्मत नहुँदा ठुलठुला खाडल बन्दै जान थालेको छ ।
लुम्बिनी प्रदेशको स्थायी राजधानी क्षेत्रको सडकको यो दूर दशाले सवारी चालक र स्थानीयले निकै सास्ती खेप्नु परेको छ । ठुला–ठुला खाडल भएर पानी पोखरी बन्दा सम्म प्रदेश सरकार र स्थानीय सरकार सहित सडक डिभिजन कार्यालयले त्यस तर्फ ध्यान नदिँदा अहिले दिनहुँ जसो दुर्घटना हुने गरेको स्थानीय तथा सवारी चालकहरूको भनाई रहेको छ ।
उक्त सडकमा हजारौँ साना ठुला गाडीहरू आहोर दोहोरो गर्ने गर्दछन् । तर सडक डिभिजन कार्यालय दाङले कालोपत्रेका नाममा कमसल काम गर्ने गरेका कारण कालोपत्रे भएको वर्ष दिन नपुग्दै सडकमा खाल्डाखुल्डी पर्ने गरेका छन् । यता यस विषयमा सडक डिभिजन कार्यालय दाङमा बुझ्दा कार्यालय प्रमुख नीरज शाक्यले वर्षाका कारण काम गर्न नसकिएको बताए । वर्षा रोकिन साथ सडक कालोपत्रे गर्ने उनले आश्वासन दिएका छन् ।
सडकमा पानी पोखरी बनेको महिनौँ दिन भई सक्यो अव पनि सडक डिभिजन कार्यालय दाङले सडक कालोपत्रे नगर्ने हो भने कुनै न कुनै दिन ठुलो दुर्घटना भई त्यसले ठुलो क्षति निम्त्याउने निश्चित छ ।
