(ABC-Sanchar)
दाङ । घोराही १९ राम्चे स्थित कोइलाखानीमा पुरिएर मृत्यू भएका मोहनलाल कामीका परिवारलाई सहयोग रकम हन्तान्तरण गरिएको छ ।
मृतकका श्रीमती ३२ बर्षकी शान्ति कामीलाई घोराहीमा सहयोग रकम हस्तान्तरण गरिएको हो । कोइलाखानीमा पुरिएर मृत्यू भएको समाचार सञ्चार माध्यममा प्रकाशन प्रसारण भएपछि सहयोग रकम जुट्न थालेको थियो ।
कामीको गत फागुन १० गते कोइला निकाल्ने क्रममा कोइलाखानी भित्रै पुरिएर मृत्यू भएको थियो । यस अगाडी मृतकका परिवारले बैंकमा जम्मा भएको तीन लाख रुपैँया प्राप्त गरिसकेका छन् । आइतरवार पत्रकार महासंगका अध्यक्ष दुर्गालाल केसी मार्फत सहयोगी दाताले पठाएको रकम हस्तान्तरण गरिएको हो ।
लमजुङ हाल इजरायलमा रहेकी विमला देवि पन्तले १० हजार तथा महेन्द्र नगर कन्चनपुरका सुशील पाण्डेले ५ हजार गरी १५ हजार रुपैँया अध्यक्ष केसी र घोराही उपमहानगरपालिका वडा नं. १९ का वडाअध्यक्ष हर्क घर्तीले हस्तान्तरण गरेका हुन्।
सहयोग रकम बुझ्ने क्रममा शान्तिले श्रीमानको मृत्यू भैसकेपछि छोराछोरीको पालन कसरी गर्ने भन्ने चिन्ता भएको बताइन् । उनका दुई छोरा तथा तीन छोरी गरी पाँच जना छोराछोरी रहेका छन् ।
जेठी छोरीको बिवाह भैसकेको छ, भने अन्य १३ बर्ष मुनिका बच्चाहरु रहेको उनले बताइन् । हाल उनिहरुको पालनपोषणका लागि सहयोगि दाताले पठाएको रकमवाटै गरिएको छ ।
