ABC (क्राईमबिट)
काठमाडौं । नेपाल प्रहरीका एआईजीहरूको सरुवा एक महिना बढी भइसक्दा पनि कार्यान्वयन हुन सकेको छैन । प्रधानमन्त्री शेरबहादुर देउवा र गृहमन्त्री बालकृष्ण खाणले चासो नदिँदा एआईजीहरूको सरुवा कार्यान्वयन हुन नसकेको हो ।
गएको असार २४ गते बसेको मन्त्रिपरिषद्को बैठकले एआईजीहरूको सरुवा गरेको थियो । जसमा महानगरीय प्रहरी कार्यालय रानीपोखरी (मेट्रो)का प्रमुख एआईजी हरिबहादुर पाललाई कार्यविभाग पठाइएको थियो ।
पालको स्थानमा प्रद्युम्न कार्कीको सरुवा गरिएको थियो । प्रशासन विभागका निरजबहादुर शाहीलाई अपराध अनुसन्धान विभागको जिम्मा दिइएको थियो भने अपराध अनुसन्धान विभागका एआईजी विश्वराज पोखरेललाई प्रहरी प्रशिक्षण प्रतिष्ठान सरुवा गरिएको थियो ।यस्तै, सहकुल थापालाई मानवस्रोतमा पदस्थापन गरिएको थियो ।
गृहमन्त्री खाणले अघिल्लो सरकारले गरेको एआईजी सरुवा कार्यान्वयन नगर्न प्रहरी प्रधान कार्यालयलाई निर्देशन दिएका कारण सरुवा रोकिएको थियो । तर, गृह मन्त्रालयले भने सरुवा रोक्न कुनै दबाब नदिएको दाबी गर्दै आएको छ । गृहकै निर्देशनमा आईजीपी शैलेश थापा क्षेत्रीले सबै एआईजीहरूलाई रमाना नलिन मौखिक निर्देशन दिएका थिए । बेथानचोक खबरबाट
