ABC (क्राईमबिट)
रौतहट । नेपाल पत्रकार महासघ रौतहटले लागूऔषध नाइट्रोभेटसहित पक्राउ परेका रौतहटका सञ्चारकर्मी मोजीबुल्लाहलाइ प्रहरीले नै फसाएको आरोप लगाएको छ ।
प्रहरिकै उच्च अधिकारीको निर्देशनमा सादा पोसाकका घुमुवाहरूले सञ्चारकर्मी मोजीबुल्लाहलाई फसाएको भन्दै नेपाल पत्रकार महासंघ रौतहट शाखाले तत्काल रिहाइ तथा दोषीलाई कारबाही गर्न माग गरेको छ ।
केही घुमुवा तथा अन्य व्यक्तिहरूले पत्रकार मोजीबुल्लाहले प्रयोग गर्ने मोटरसाइकलमा लागूऔषध नाइट्रोभेट राख्दै गरेको सिसिटिभी फुटेज सार्वजनिक भएपछि पत्रकार मोजीबुल्लाह निर्दोष रहेको प्रमाणित भएको महासंघले दाबी गरेको छ ।
सार्वजनिक भएको भिडियो फुटेजमा गौरमा रहेको ग्रिन सिग्नल होटेल अगाडि सडक पेटिमा खडा गरी राखिएको मोटरसाइकलमा केही व्यक्तिहरूले केही सामानहरू झुन्डाइरहेको देखिएको छ । भिडियो फुटेजमा सादा पोसाकका केही घुमुवा प्रहरीहरू उदय यादव र मनोज साहको पहिचान खुलेको हो । उनीहरूसंगै रहेका अन्य घुमुवा प्रहरीहरूको पहिचान खुलेको छैन ।
साँझ करिब ७ बजेको समयमा ती सादा पोसाकका घुमुवा प्रहरीहरूसंगै दुई जना युवकहरू नाटकीय शैलीमा केही सामानहरू पत्रकार मोजीबुल्लाहको मोटरसाइकलमा झुन्डाइरहेको देखिएको छ । सेतो हेलमेट लगाई स्प्लेन्डर प्लस मोटरसाइकलमा आएका ती दुई जना युवाहरूले सामान झुन्डाउनु भन्दा अगाडि र झुन्डाइसकेपछि त्यही रहेका घुमुवासँग कुराकानी गरिरहेको देखिएको छ । पत्रकार मोजीबुल्लाहलाई सो होटेलका सञ्चालकले नै खानपिन गर्न बोलाएका थिए ।
पत्रकार मोजबुल्लाहलाई श्रावण ३२ गते बेलुका करिब ८ बजे प्रहरीले लागूऔषध नाइट्रोभेट सहित अदालत अगाडीबाट पक्राउ गरेको थियो । भिडियो फुटेज सार्वजनिक भएपछि घटनामा प्रहरीको भूमिका प्रष्ट भएको बताइएको छ । भिडियो सार्वजनिक भएपछि भिडियोमा देखिएको भनिएको धिरज यादव र जितेश यादवलाई प्रहरीले पक्राउ गरेको छ । धिरजलाई शुक्रवार बेलुका गौरबाट पक्राउ गरिएको हो भन्ने जितेश यादवलाई शनिवार बिहानै उनको सर्लाहीस्थित घरबाट पक्राउ गरिएको हो ।
नेपाल पत्रकार महासंघ रौतहट शाखाले पक्राउ परेका पत्रकार मोजीबुल्लाह निर्दोष रहेको दाबी गर्दै तत्काल रिहा गर्न र यस घटनामा पत्रकारलाई फसाउने कार्यमा संलग्नहरुलाई कानुनी दायरामा नल्याए आन्दोलन गर्न बाध्य हुने चेतावनी समेत दिएको छ ।
पत्रकार महासंघका अध्यक्ष प्रेमचन्द्र झाले घटनाबाट नेपाल प्रहरीको साखमा गम्भीर धक्का पुगेको भन्दै प्रहरीको व्यावसायिकतालाई गिज्याउने घटनालाई गम्भीरतापूर्वक लिन आग्रह गरेका छन् ।
यात्रा डेलीबाट
