(ABC-Sanchar)
काठमाडौँ । काठमाडौँका प्रमुख जिल्ला अधिकारी गोबिन्द प्रसाद रिजालले पदबहाली गरेका छन् ।
मंगलबार पत्र बुझेका रिजालले बुधवार दिउँसो जिल्ला प्रशासन कार्यालय, काठमाडौँमा पदबहाली गरेका हुन् । ७ वटा जिल्लाको प्रजिअ भई सकेका रिजालले ४६ औँ प्रजिअका रुपमा काठमाडौँको प्रशासनिक कमाण्ड सम्हालेका हुन् । अधिकृत, उपसचिव तथा सहसचिवसम्मै गृह प्रशासनमा काम गरेको अनुभव रिजालसँग छ ।
सम्बन्धित समाचार : काठमाडौँको सिडीओमा गोबिन्द रिजाल
लामो समय गृह प्रशासनमा रही काम गरेको अनुभवबाट पनि सेवाग्राहीको भिडभाड रहने काठमाडौँ जिल्ला प्रशासनबाट दिइने सेवा प्रवाहमा थप चुस्तता ल्याउने प्रजिअ रिजालले बताए । नयाँ प्रजिअको स्वागतका लागि उपस्थित जिल्लास्थित सुरक्षा निकायका प्रमुख तथा कार्यालयका कर्मचारीहरुलाई सम्बोधन गर्दै उनले प्रशासनमा देखिएको कर्मचारी अभावलाई मन्त्रालयको समन्वयमा परिपूर्ति गरिने र हाल भईरहेकै जनशक्तिबाट पनि कसरी बढी भन्दा बढी सेवा दिन सकिन्छ भन्ने विषयमा थप छलफल र समन्वयमा काम गर्ने बताए ।
काठमाडौँ जिल्ला प्रशासनले दिने सेवा प्रवाहमा चुस्तता ल्याउन र सोको महसुसिकरण आम सेवाग्राहीलाई गराउन सबै कर्मचारीको साथ र सहयोगको अपेक्षा गरेको प्रजिअ रिजालले बताए ।
सोही समारोहमा बिदाई गरिएका तत्कालिन प्रजिअ काली प्रसाद पराजुलीले काठमाडौँ जिल्ला प्रशासनले ७७ वटै जिल्लाका नागरिकहरुलाई पनि सेवा दिनु पर्ने भएकोले अन्य जिल्लाभन्दा फरक अनुभव गरेको र गृहको लामो अनुभवी नवनियुक्त प्रजिअ रिजालले सो भूमिका कुशलतापूर्वक निर्वाह गर्न सक्ने भन्दै कार्यकालको शुभकामना दिए ।
प्रजिअ रिजालको जिल्लास्थित सुरक्षा निकायका प्रमुख तथा कार्यालयका कर्मचारीहरुले फूलमालासहित स्वागत गरेका थिए ।
