(महेन्द्र सिंह)
बाँके । नेपालगन्जको जमुनाहा नाकामा दशैं तिहार तथा छठ पर्वलाई मध्यनजर गर्दै बाँके प्रहरीले चेकजाँचमा तीब्र कडाई गरेको छ । जिल्ला प्रहरी कार्यालय बाँकेले शनिबार बिहानदेखि जमुनाहा नाकामा तालिम प्राप्त प्रहरी कुकुर परिचालन गरेको छ ।
बाँके प्रहरीले कोहलपुरबाट डग हेन्डलर सहितको टोली लिएर जमुनाहा नाकामा चेकजाँच सुरु गरेको जिल्ला प्रहरी कार्यालय बाँकेका प्रहरी प्रमुख एसपी श्यामकृष्ण अधिकारीले जानकारी दिएका छन । तालिम प्राप्त कुकुरहरुले गाडी तथा यात्रुहरुका सामाग्रीहरु सुँघेर चेकजाँच गरेको छन । नाकामा हुन सक्ने कुनै पनि संदिग्ध ब्यक्ति अथवा अन्य कुरा पनि ती तालिम प्राप्त कुकुरहरुले पत्ता लगाउने बाँके प्रहरीले जानकारी दिएको छ ।
जिल्ला प्रहरी बाँकेबाट प्रहरी निरीक्षक ईश्वरदेब गिरीको कमान्डमा गएको डग हेन्डलर सहितको टोलीले भारतबाट नेपालतर्फ र नेपालबाट भारततर्फ आवतजावत गर्ने सवारीसाधन, पैदल यात्रीहरुलाई संयुक्तरुपमा चेकजाँच गर्नेछ ।
