(ABC-Sanchar)
काठमाडौं । यो वर्षको बडादशैंमा लत्ताकपडाको मूल्य बढेको छ । कोरोना महामारीका कारण अन्तरराष्ट्रिय बजारमा नै लत्ताकपडाको उत्पादन लागत बढेको र आयात गर्दाको ढुवानी भाडासमेत बढेकाले हरेक किसिमका लत्ताकपडाको मूल्य बढेको व्यापारीहरुले बताएका छन् ।
कोरोना महामारी शुरु भएयता आयातकर्ता व्यापारीहरुले ढुवानी भाडा चार गुणासम्म बढी मूल्य तिरेका छन् । उत्तरीनाका पुर्णरुपमा सञ्चालन हुन नसक्दा सडक मार्ग हुँदै आउनु पर्ने लत्ताकपडा समुद्रिमार्ग हुँदै भारतको बाटोबाट आयात गर्नु परेको छ । यसले गर्दा ढुवानी भाडा महंगो हुन गइ मूल्य बढेको हो । फेन्सी, थान कपडादेखि जुत्ता चप्पल सबैको मूल्य बढेको व्यापारीहरुले बताएका छन् । 
उनीहरुका अनुसार, यो वर्ष लत्ताकपडामा २० प्रतिशतभन्दा धेरै मूल्यवृद्धि भएको छ। काठमाडौंको असनस्थित फेन्सी कपडाका थोक व्यापारी राजेश घिमिरेले यसअघि १ हजार ५०० रुपैयाँसम्म पर्ने जुनसुकै फेन्सी आइटमको मूल्य अहिले २ हजार रुपैयाँसम्म पुगेको बताए । हरेक आइटमका लुगा कपडामा ५०० देखि ६०० रुपैयाँसम्म मूल्य वृद्धि भएको उनले बताए ।
