(ABC-Sanchar)
बाँके । लुम्बिनी प्रदेश सरकारका वन वातावरण तथा भू-संरक्षण मन्त्री सुरेन्द्र बहादुर हमालले बाँकेवासीको शीर निहुरिन नदिने बताएका छन् ।
नवनियुक्त मन्त्री हमाललाई बधाई ज्ञापन गर्न नेपाल प्रेस युनियन बाँकेले आज नेपालगन्जमा आयोजना गरेको पत्रकार भेटघाट कार्यक्रममा उनले भने-“जिल्लाले ममाथि ठूलो विश्वास गरेको छ, म यहीँको सांसद भएको नाताले जिल्लावासीको धेरै अपेक्षा छ, म जतिसक्दो राम्रोसंग काम गर्छु, तपाईंहरु ढुक्क हुनुहोस्, मैले बाँकेवासीको शीर निहुराउने कुनै काम गर्दैन ।” उनले काम गर्ने बेलामा झुठो र पूरा नहुने आश्वासन कसैलाई नदिने बताए । 
उनले वनजंगलमा यत्रतत्र परेका कुकाठहरु तत्काल निकालेर वृक्षारोपण गर्ने बताए । “ती ढलेका रुखहरु, यत्रतत्र छरिएका काठहरु जति दिन रहन दियो, राज्यलाई त्यति नै नोक्सान हुने भएकाले १२ वटै जिल्लामा ती काठहरुको व्यवस्थापन गरेर नयाँ रुख रोप्ने हो,” मन्त्री हमालले भने । उनले वातावरण संरक्षण र संवर्द्धनको लागि वैज्ञानिक वृक्षारोपणमा जोड दिने आफ्नो योजना रहेको सुनाए । मन्त्री हमालले कोहलपुर-नेपालगन्ज, तुलसीपुर-घोराही र बुटवल-घोराही सडकखण्डको वीचमा रुख रोपेर हरियाली बनाइने बताए । उनले वयश्क रुख रोप्दा उपयुक्त हुने सुझाव आएकाले वयश्क रुख रोप्ने योजना रहेको बताए । उनले भू-संरक्षण, बाढीपहिरो, नदी कटानको समस्या समाधानका विषयमा कसरी काम गर्न सकिन्छ भनेर आफू छलफलमै रहेको बताए ।
नेपाल प्रेस युनियन बाँकेका अध्यक्ष अर्जुन वलीको अध्यक्षतामा भएको कार्यक्रममा नवनियुक्त मन्त्री हमाललाई पत्रकारहरुले सल्लाह सुझाव समेत दिँदै केही जिज्ञासा राखेका थिए । नेपाल पत्रकार महासंघ बाँकेका अध्यक्ष दामोदर भण्डारी, पूर्व अध्यक्ष निरज गौतम, एभिन्युज टेलिभिजनका खम्ब पुन, माउन्टेन टेलिभिजनका कुशल दर्लामीले सल्लाह सुझावसंगै जिज्ञासा राखेका थिए ।
