(रवि वर्णवाल)
वीरगन्ज । नेपालकै ठुलो आर्थिक राजधानीका रूपमा स्थापित वीरगन्ज बजारमा अवस्थित घण्टाघरको घडी पुनः सञ्चालनमा आएको छ ।
विगत छ वर्षदेखि बिग्रिएको अवस्थामा रहेको घण्टाघरको घडी वीरगन्ज महानगरपालिकाको पहलमा मर्मत सम्भारपश्चात् पुनः सञ्चालनमा आएको हो ।
महानगरपालिकाले घण्टाघरस्थित घडीको मर्मत सम्भार गरेर घडी पुनः सञ्चालनमा ल्याएको महानगर प्रमुख विजयकुमार सरावगीले बताए।
साथै आगामी दिनमा घण्टाघरको व्यवस्थापन गर्ने जिम्मा वीरगन्ज महानगरपालिकाले नै लिने भएको हो । घण्टाघर व्यवस्थापनका लागि महानगरपालिकाले चालु आव ०७८/०७९ मा रु ५० लाख बजेटसमेत विनियोजन गरेको जनाइएको छ ।
वीरगन्जको पहिचानका रूपमा परिचित घण्टाघर प्रमुख आकर्षणको केन्द्रबिन्दु हो । धेरैको जमघट गर्ने स्थल पनि घण्टाघर नै हो । त्यही घण्टाघरको घडी लामो समयदेखि बिग्रिएको थियो ।
