(महेन्द्र सिंह)
बाँके । नेपालगन्ज उपमहानगरपालिका २० मा रहेको विमानस्थल छेउको एक होटलबाट प्रहरीले सुनको एक किलोको बिस्कुटसहित बुधबार राती दुई जनालाई नियन्त्रणमा लिएको हो ।
अबैध सुनको कारोबार भइरहेको सूचनाको आधारमा पुगेको प्रहरीले सुन जस्तो देखिने पहेलो रंगको धातुसहित दुई जनालाई नियन्त्रणमा लिएको जिल्ला प्रहरी कार्यालय बाँकेका प्रहरी प्रमुख एसपी श्याम कृष्ण अधिकारीले जानकारी दिए ।
प्रहरीले बरामद गरेको एउटा सुनको बिस्कुटमा गोल्ड एक किलो देखिएको छ । पक्राउ पर्नेहरुमा जाजरकोटको बारेकोट गाउँपालिका वडा नम्बर ६ का २२ वर्षीय राजु कार्की र वडा नम्बर ८ का २९ वर्षीय पूर्णबहादुर विक रहेका छन् ।
उनीहरुको साथबाट सुनसहित दुई लाख सतहत्तर हजार नगद र चार लाख रुपैयाँको चेक समेत बरामद भएको बाँके प्रहरीले जनाएको छ । बाँके प्रहरीले केही महिनाअघि मात्र नेपालगन्ज विमानस्थलबाट ४ किलो बढी सुन बरामद भएको छ ।
