ABC (क्राईमबिट)
काठमाडौं । नेपाल प्रहरी र सशस्त्र प्रहरी बलमा महानिरीक्षक नियुक्त गर्न शनिबार बिहान मन्त्रिपरिषद्को बैठक बस्ने भएको छ । आइतबार बेलुकाबाट नेपाल प्रहरीका महानिरीक्षक शैलेश थापा क्षेत्री तथा सशस्त्र प्रहरी बलका पुष्पराम केसीले अवकाश पाउँदैछन् ।
आइजिपी नियुक्तिमै केन्द्रीत भई शनिबार मन्त्रिपरिषद् बैठक बोलाइएको एक मन्त्रीले जानकारी दिए ।
नेपाल प्रहरीको महानिरीक्षकमा चार एआइजीबीच प्रतिस्पर्धा छ । विश्वराज पोखरेल, सहकुल थापा, धिरजप्रताप सिंह र रबिन्द्र धानुकबीच प्रतिस्पर्धा छ । उनीहरुमध्ये पोखरेल र सिंहबीच मुख्य प्रतिस्पर्धा रहेको स्रोत बताउँछ । उनीहरु फरक–फरक समयमा एआइजीमा बढुवा भएपनि एउटै ब्याचका हुन् । पोखरेल अरुभन्दा अघि एआइजी भएकाले त्यसैको आडमा आइजिपी हुने दाउमा छन् भने सिंहले सत्तागठबन्धनलाई विश्वासमा लिएको चर्चा प्रहरीमा छ ।
उता सशस्त्र प्रहरीमा भने राजु अर्याल आइजिपीका एक्ला प्रतिस्पर्धी हु्न । यद्यपी आइजिपी पुष्पराम केसीले आफ्नो पदावधि थप्ने प्रयास गरिरहेका छन् । तर, उनको चलखेल कमजोर भएकाले अर्याल नै महानिरीक्षक हुने सुनिश्चित जस्तै भएको छ।
शनिबारकै बैठकले राष्ट्रिय अनुसन्धान विभागमा एआइजीको एक पद रिक्त हुँदैछ । त्यसमा पनि बढुवा गर्ने सम्भावना छ । जसमा हुतराज थापा, ओम जोशी, हरिहर पौडेल, टेकेन्द्र कार्की, सुमन बैद्य, कुलदिप थापा लगायत प्रतिस्पर्धामा छन् । विभागमा हाल एआइजी हुने नै भदौमा प्रमुख हुने भएकाले तिव्र प्रतिस्पर्धा छ ।
