(महेन्द्र सिंह)
बर्दिया । मधुवन नगरपालिका वडा नम्बर -५ का वडा अध्यक्ष दिलिप गुरुङले मधुवनमा मल तस्करी नभएको भन्दै मिडियामा आएको समाचार प्रति आफ्नो ध्यानाकर्षण भएको बताउनुभएको छ ।
उहाँले मधुवन नगरपालिकाका खेतीकिसानी गर्ने जनताले मलको अभाव खेपिरहेको बताउँदै मिडियामा आए जस्तो मल तस्करी नभएको बताउनुभयो ।
उहाँले नेपालकागजसँग सम्पर्क गर्दै भन्नुभयो, “मधुवनको प्रहरी प्रशासनका कारण यहाँ हुने आपराधिक घटनामा कमी आएको छ । यहाँको अपराध नियन्त्रणमा सहयोग मिलेको छ । प्रत्यक्ष वा अप्रत्यक्ष रुपमा कसैले पनि मल तस्करी गरेको छैन”
उहाँले भन्नुभयो, “मधुवनका कृषकहरु मल नपाएर समस्यामा छन । रोपाइ प्रभावित भएको छ । मधुवनमा हुने उछृंखल तथा आपराधिक घटनामा कमी आएको छ । प्रहरी प्रशासन दत्तचित्त भएर कर्तव्य पालनामा लागेको छ । यस्ता विषयमा पनि सम्पुर्ण मिडियालाई ध्यान केन्द्रीकृत गर्न अनुरोध गर्छु ।”
वडा अध्यक्ष गुरुङले मिडियामा कृषकका समस्यालाई प्राथमिकता दिन अनुरोध गर्दै भन्नुभयो, “मुख्य विषय कृषकलाई मलको अभाव छ । मल आपूर्ति गरेर सरकारले समयमै किसानलाई उपलब्ध गराउनुपर्यो । यो विषयमा मिडियाले ठाउँ दिनुपर्यो ।”
