ABC-SANCHAR
काठमाडौं । नेपाल वायुसेवा निगमका निलम्बित कार्यकारी अध्यक्ष युवराज अधिकारीसँग आज (बिहीबार) पनि बयान लिइएको छ ।
सर्वोच्च अदालतका कामु प्रधानन्यायाधीश दीपककुमार कार्की र न्यायाधीश प्रकाश ढुंगानाको संयुक्त इजलासले असार २८ गते छानविन प्रतिवेदन झिकाउने आदेश दिएपछि अधिकारीसँग आज पनि बयान लिइएको पर्यटन मन्त्रालय स्रोतले दृष्टिन्युजलाई बताएको छ ।
निगमको कार्यकारी अध्यक्षलाई भ्रष्टाचार गरेको आरोपमा छानविन गर्न गत असार ६ गते पर्यटन सचिव महेश्वर न्यौपानेको संयोजत्वमा तीन सदस्यीय छानविन समिति गठन गरिएको थियो ।
पर्यटन मन्त्रालय स्रोतका अनुसार कार्यकारी अध्यक्ष अधिकारीले निगमलाई हानी नोक्सानी पुर्याउने काम गरेकाले उनीमाथि मन्त्रालयले पटक पटक स्पष्टीकरण सोधेको थियो । तर, अधिकारीले जवाफमा पनि धेरै कुरा ढाँटेको र प्रमाण लुकाउन सक्ने देखिएकाले उनलाई निलम्बन गरेर कारबाही अगाडि बढाएको थियो ।
मन्त्रिपरिषदले असार ६ गते गरेको निलम्बनको विरुद्ध सर्वोच्च अदालतका न्यायाधीश तिलकप्रसाद श्रेष्ठको इजलासले अल्पकालीन आदेश दिँदै उनको निलम्बन फुकुवा गरिएको थियो ।
मन्त्रालयको बयानका क्रममा पनि अधिकारीले धेरै कुरा ढाँटेको पाइएकाले बयान लिने सदस्यहरु हैरान भएका छन् । जे कुरा पनि ढाँट्ने र बयानका क्रममा रुने गरेको स्रोतले बताएको छ ।
मन्त्रालय स्रोतका अनुसार पेसेन्जर सर्भिस सिष्टम (पीएसएस)को ठेक्का सम्झौतामा कार्यकारी अध्यक्ष अधिकारीले एचआईटिआईटी टर्कीको कम्पनीसँग मोटो रकम कमिशन खाएको प्रमाण फेला परेको छ ।
स्रोतका अनुसार पीएसएसका लागि खोलिएको टेण्डरमा ७ वटा कम्पनीले आवेदन दिएका थिए । त्यसमध्ये दुई वटा कम्पनीलाई मात्र प्रि–क्वालिफाई गरिएको थियो । पीएसएसका लागि सबैभन्दा योग्य हङकङको स्काई ट्राभल नामक कम्पनी थियो ।
सुरुमा स्काईले ९५ अंक पाएको थियो । ७० अंक आउनुपर्ने उक्त टेण्डरको मापदण्डमा स्काई ट्राभलले राम्रो अंक ल्याएपछि दोस्रो पटकको मूल्याँकनमा स्काई ट्राभललाई ६९.४४ प्रतिशत अंकमा झारियो र ८०.७१ अंक दिएर टर्कीको कम्पनी एचआईटीआईटीलाई उक्त ठेक्का पाँच वर्षका लागि ४१ लाख ४४ हजार ४ सय ६४.४३ अमेरिकी डलरमा सम्झौता गरियो ।
निगम स्रोतका अनुसार टर्कीको एचआईटीआईटी कम्पनीसँग सम्झौता गर्नु अगाडि कमिशनको ग्यारेन्टीका लागि ९ जनवरी २०२२ मा कर्मशियल डाइरेक्टर जनकराज कालाखेतीलाई टर्की पठाइएको थियो । र, कमिशन जम्मा गर्न अष्ट्रेलियाको वेस्ट प्याक बैंकमा जनता सेवा प्रालिको नाममा खाता खोलियो । उक्त बैंकको खाता नम्बर ९७९३२० एबीडी नम्बर ०३२०५५ हो ।
अधिकारीले टर्कीको कम्पनीबाट लिएको कमिशन यसै खातामा जम्मा गरेको स्रोतको भनाइ छ । यस विषयमा अख्तियार दुरुपयोग अनुसन्धान आयोगले समेत छानविन गरेको स्रोतले बताएको छ । दृष्टि-न्युजबाट
