ABC (क्राईमबिट)
धनगढी । कञ्चनपुर जिल्लाको दोधाराचाँदनी नगरपालिका ३ जमुनाघारीस्थित सीमा ईलाकाबाट आइतबार सशस्त्र प्रहरीले करीब १ लाख ६७ हजार रुपैयाँ बराबरको भन्सार छलीको लत्ताकपडा र प्लाष्टिकको कुर्सी बरामद गरेको छ ।
उक्त सामान सशस्त्र प्रहरी बल नेपाल बिओपी देविस्थानले बरामद गरी भन्सार कार्यालय गड्डाचौकीमा बुझाइएको सशस्त्र प्रहरीले जनाएको छ ।
यसैगरी पर्सा जिल्लाको बीरगंज महानगरपालिका १४ गण्डक चौकबाटसशस्त्र प्रहरीले करीब ५९ लाख ३४ हजार ७ सय ५८ रुपैयाँ बराबरको प्रज्ञापन पत्र विनाको विभिन्न सामान बरामद गरेको छ ।
बीरगंजबाट पथलैयातर्फ जाँदै गरेको ना ५ ख ७८२० नम्बरको ट्रकमा सशस्त्र प्रहरी बल नेपाल नम्बर १३ गण पर्साले जाँच गर्दा भन्सार छलीको स्टेशनरी सामान, ब्याट्री, औषधी, प्लाई उड, एसिड फेला परेपछि उक्त सामानसहित ट्रक नियन्त्रणमा लिइएको हो ।
बरामद सामान र ट्रक आवश्यक कारवाहीको लागि राजश्व अनुसन्धान कार्यालय पथलैया बारामा बुझाइएको सशस्त्र प्रहरीले जनाएको छ ।
