(ABC Sanchar) धनुषामा दिउँसै रकम लुटेर फरार भएका दुई जना युवक पक्राउ परेका छन्।
लक्ष्मीनियाँ गाउँपालिका वडा नं. ६ निकाल बस्ने २० वर्षीय भरोशी भन्ने नरेश यादव र वडा नं. ४ बस्ने २३ वर्षीय सरोज दास पक्राउ परेको प्रहरीले जनाएको छ।
बुधबार दिउँसो साढे २ बजे लक्ष्मीनियाँ गाउँपालिका ४, सपहीस्थित रहेको मेगा बैंकबाट १ लाख ८० हजार रुपैयाँ निकालेर स्थानीय ७५ वर्षीय रामदास घर फर्किंदै गर्दा दुबै जनाले लुटपाट गरेका थिए। धनुषाका एसपी बसन्त रजौरेका अनुसार लुटपाट गर्नुअघि सरोज र नरेश दुबैले बैंकबाट पैसा निकाल्ने व्यक्तिहरूको रेकी गरेका थिए।
दासले पैसा निकालेर घर फर्किंदै गर्दा ज १२ प ८५९३ नम्बरको मोटरसाइकलमा सवार भई एकान्त देखेपछि दुबै जनाले लुटपाट गरेका थिए।
वृद्ध दासलाई एक्लै पैदलै घरतर्फ जाँदै गरेको देखेर दुबै जनाले झोलाबाट पैसा लुटेर भागेका थिए।
अपरिचित व्यक्तिले पैसा लुटेर फरार भएको सूचना प्रहरीमा आएपछि धनुषाका एसपी रजौरे आफैं घटनास्थल पुगेर अनुसन्धान सुरू गरेका थिए।
अनुसन्धान गर्दै जाँदा दुबै जनाले लुटपाट गरेको रकम र मोटरसाइकलसहित बुधबार बेलुकी पक्राउ परेको एसपी रजौरेले बताए।
उनका अनुसार लुटिएको रकममध्ये १ लाख ७५ हजार भरोशीको छाप्रो घरमा माटोमा खाल्डो खनी गाडेको अवस्थामा प्रहरीले बरामद गरेको छ। त्यसैगरी सरोजबाट १ हजार ५ सय बरामद गरिएको उनले बताए।साभार
