(ABC Sanchar) पत्रकार र आश्रित परिवारको अब निःशुल्क रुपमा आँखाको चेकजाँच हुने भएको छ । नेपाल पत्रकार महासंघ, उपत्यका प्रदेश समिति र एएसजी आई केयर एण्ड हेल्थ सर्भिसेज प्रालिबीच सोमबार पत्रकार र पत्रकारको परिवारको निःशुल्क आँखा चेकजाँच गर्ने सम्बन्धमा समझदारी भएको छ ।उपत्यका प्रदेशको अनामनगरस्थित कार्यालयमा सोमबार एक कार्यक्रमकाबीच सम्झौता पत्र (एमओयू) मा हस्ताक्षर भएको हो । एमओयू हस्ताक्षर कार्यक्रममा नेपाल पत्रकार महासंघका केन्द्रीय महासचिव रोशन पुरीले दुई निकायबीचको समझदारीले अब पत्रकार तथा सञ्चारकर्मी र तिनका आश्रित परिवारले सजिलैसँग आँखाको चेकजाँच गराउन सजिलो भएको बताए । सम्झौताअनुसार पत्रकारहरुको दृष्टि बचाउने उद्देश्य राखेर उपत्यका प्रदेशको समन्वयमा नियमित रुपमा आई क्याम्प लगायतका कार्यक्रम पनि सञ्चालन गरिनेछ । ‘पत्रकारहरुको दृष्टि बचाउ अभियान’ अन्तर्गत उपत्यका प्रदेश समितिको सिफारिसमा क्रियाशील पत्रकार तथा सञ्चारकर्मीका साथै उनीहरुका परिवारले समेत निःशुल्क रुपमा उक्त सुविधा पाउने छन् ।
पत्रकारहरुको दृष्टि बचाउ अभियान कार्यक्रमलाई देशभर नै पुर्याउनुपर्ने पुरीको भनाई छ । उपत्यका प्रदेशका अध्यक्ष श्रीजन झाले अस्पतालसँगको सहकार्यमा अब नियमित रुपमा आई क्याम्पहरू जस्ता कार्यक्रमहरु सञ्चालन गरिने जानकारी दिए । यस अभियानलाई अन्य प्रदेशहरूसँग पनि समन्वय गरेर विस्तार गर्दै लैजाने उनको भनाई छ ।
अस्पतालका कर्पोरेट म्यानेजर राजीव झाले पत्रकार तथा उनीहरुका परिवारले निःशुल्क आँखाको चेकजाँच तथा निःशुल्क ओपिडी सेवा लिन सक्ने जानकारी दिए । उनका अनुसार पत्रकार तथा उनका परिवारका सदस्यहरुलाई पनि सर्जरी लगायत सेवामा भने १५ प्रतिशतसम्म छुट दिनेछ ।प्रदेश महासचिव टेनिस रोकाले अभियानले पत्रकारहरुलाई आँखाको चेकजाँच तथा सुरक्षामा सहयोग पुग्ने अपेक्षा व्यक्त गरे । एएसजी आँखा अस्पताल नेपाल, भारत र अफ्रिकाको युगान्डामा कार्यालय रहेको अस्पताल हो । साभार
