बुटवलको तिनाउ नदीले बगाएर बेपत्ता भएका बुटवलका एक युवा मृत अवस्थामा फेला परेका छन्। शनिबार बिहान तिनाउमा बगेर बेपत्ता भएका बुटवल उपमहानगरपालिका वडा नं ११ सिरानगाउँ मजुवाका डिल्लीराज अर्याल दिउँसो मृत अवस्थामा फेला परेको इलाका प्रहरी कार्यालय बुटवलले जनाएको छ।
मजुवाबाट तिनाउ तरेर लुम्बिनी प्रादेशिक अस्पतालतर्फ जाने क्रममा उनलाई बिहान नदीले बगाएको थियो। नदीमा परेर बेपत्ता भएपछि उनको खोजी गर्ने क्रममा शुद्धोधन गाउँपालिका-४ बेतानीमा शव फेला परेको प्रहरीले जनाएको छ।
अर्यालको खोजीको लागि तिनाउ नदीमा बाँध लगाएर पानीलाई दानव नदीतर्फ फर्काएर तिनाउको पानी सुकाइएको थियो। सोही क्रममा बेतानीमा शव फेला परेको प्रहरीले जनाएको छ।
कामका लागि गुल्मीदेखि बुटवल आएका अर्यालले लुम्बिनी प्रादेशिक अस्पताल अगाडि फुटपाथमा व्यवसाय सञ्चालन गर्दै आएका थिए। शव फेला परेपछि प्रहरीले आवश्यक प्रक्रिया पूरा गरी आफन्तको जिम्मा लगाएको जनाएको छ।साभार
