काठमाडौं, १४ कात्तिक । राजधानीमा जुवाको अखडा चलाउँदै आएका नेपाली सेनाका एक जना अवकाशप्राप्त जर्नेल जुवाको खालबाटै समातिएका छन् ।
ललितपुरको धापाखेलस्थित आफ्नै घरमा जुवाको खाल चलाउँदै गरेको अवस्थामा नेपाली सेनाका पूर्व दुईतारे जर्नेल होमकुमार लावतीसहित ६ जनालाई प्रहरीले रंगेहात पक्राउ गरेको हो ।
लावती अवकाशअघि सेनाको मुद्दा मामिला हेर्ने कानुन विभाग (प्राड विवाक) का प्रमुख थिए । उनको घरमा सधैं जुवाको खाल चल्ने गरेको छिमेकीहरूले खबर गरेपछि प्रहरीले छापा मारेर तास, कौडा, नगदसहित सबैलाई समातेको बताइएको छ ।
स्रोतका अनुसार, पूर्वजर्नेल लावतीले ललितपुरको सातदोबाटो र धापासीहाइटमा दिनहुँ जसो जुवा, तास र कौडा खेलाउने गर्छन् । लावतीका कारण एक दर्जन व्यक्तिको घरबार बिग्रिएको छ । एक हजार प्वाइन्टमा म्यारिज खेलाउने पूर्व जर्नेल लावतीले जुवामा हार्नेहरूलाई कागज गरेर मिटर व्याजमा पैसा ऋणमा पनि लगाउने गरेको पाइएको छ ।
लावतीले ललितपुरका खुँखार जुवाडे भनेर नाम कहलिएका सचिन महर्जनसँग सेटिङ मिलाएर गर्छन् । महर्जनले जुवा खेलेरै करोडौँको सम्पत्ति जोडेका छन् । सामान्य परिवारका सचिन महर्जनसँग अहिले एक अर्बभन्दा धेरै सम्पत्ति छ ।
ललितपुरमा जुवाडेका रूपमा कहलिएका महर्जनले सट्टेबाजीमा पनि काम गर्छन् । जुवा खेल्न आउने जुवाडेलाई लावती र सचिन महर्जन मिलेर कङ्गाल बनाउने गरेको आरोप छ ।दैनिक नेपालबाट ।
