(राजन थारू)
कैलाली । धनगढी बजारस्थित मुल सडक विस्तार गर्न आसपासका संरचना हटाउँदै उपमहानगर कैलाली पुलदेखि क्याम्पस रोडसम्मको सवा २ किमि सडक ३० मिटर फराकिलो बनाउन दुवैतर्फका संरचना भत्काइँदै
धनगढी — धनगढी उपमहागरपालिकाले मुख्य बजार क्षेत्रको सडक चौडा बनाउन दुवैतर्फका संरचना भत्काउन सुरु गरेको छ । बजारलाई ‘स्मार्ट सिटी’ को मापदण्डमा लैजान मुख्य बजारको पुनर्निर्माण कार्य सुरुवात गरिएको उपमहानगर प्रमुख गोपाल हमालले बताए । उनका अनुसार पहिलो चरणमा भत्काउन सहमति दिइसकेका सरकारी, गैरसरकारी निकाय र निजी घरधनीका संरचना भत्काउन थालिएको हो ।
उपमहानगरले शुक्रबार सेती प्रादेशिक अस्पतालका सटर र प्रयोगशाला भवनमा डोजर लगाएर अभिायनको थालनी गरेको हो । शनिबार र आइतबार मुख्य बजारकै लक्ष्मीनारायण मन्दिर, र त्रिनगर स्कुलका सटर भत्काएको छ । प्रमुख हमालले अधिकांश घरधनीले बजार क्षेत्र सुधार र विस्तारमा आफ्ना संरचना भत्काउन अनुमति दिइसकेको दाबी गरे । ‘अटेरी गर्नेको जबर्जस्ती पनि संरचना हटाइन्छ,’ उनले भने, ‘त्यो समस्या आउँदैन जस्तो लागेको छ ।’
मुख्य सडकको क्षेत्राधिकारभित्र पर्ने संरचना हटाउने सवालमा असहमत हुनेलाई वार्ताका माध्यमबाट सहमतिमा ल्याउने प्रयासमा उपमहानगर छ । यसका लागि घरधनीसंँग वार्ता गर्न प्राविधिकसहितको टोली पनि बनाएको प्रमुख हमालले बताए । मर्कामा पर्ने घरधनीको तर्फबाट वार्तामा सामेल हुन अर्जुन श्रेष्ठको नेतृत्वमा ५ सदस्यीय समिति गठन भएको छ । ‘मेरो चुनावी नारा नै धनगढीको मुख्य बजार फराकिलो मात्रै होइन, स्मार्ट सिटीको मापदण्डमा लैजाने हो । यसले धनगढीको स्वरूपमा नै परिवर्तन ल्याउँछ,’ उनको भनाइ छ ।
१८ महिनापछि धनगढीको मुख्य बजार मार्ग कुनै समृद्ध सहरको जस्तै बन्ने उनले दाबी गरे । कैलाली पुलदेखि क्याम्पस रोडसम्मको सवा २ किलोमिटर सडक ३० मिटर फराकिलो बनाउन लागिएको छ । विस्तार हुने सडकको दायाँबायाँ साइकल लेन, पार्किङ, अपांगमैत्री पेटी, हरियालीसहितको डीपीआर तयार भएको उनले सुनाए । यसका लागि ६० करोड रुपैयाँ बजेट आवश्यक पर्ने उपमहानगरको अनुमान छ । एसीयाली विकास बैंक (एडीबी) को सहयोगमा धनगढीको चौराहादेखि कैलाली पुलसम्मको झन्डै २२ सय मिटर सडक विस्तारको ठेक्का लागिसकेको छ ।
