(महेन्द्र सिंह)
काठमाडौं । लुम्बिनीको प्रहरी प्रमुखमा सरुवा भएसँगै विवादमा पर्दै आएका डीआईजी नलप्रसाद उपाध्यायले रकम उठौतीमा मात्र ध्यान दिएको भन्दै मातहतका जिल्ला प्रमुख एसपीहरुले प्रहरी प्रधान कार्यालयमा गुनासो गरेका छन् ।
उपाध्यायले घुुमवालाई रकम उठाउन प्रयोग गरेको भन्दै एसपीहरुले गुनासो गरेपछि प्रहरी प्रधान कार्यालयले पनि छानबिन सुरु गरेको प्रहरीको उच्च स्रोतले जानकारी दिएको हो ।
डीआईजी उपाध्याय गत स्थानीय तहको निर्वाचन अघि २१ वैशाखमा लुम्बिनीमा सरुवा भएका थिए । त्यस अघिका डीआईजी मुकुन्द प्रसाद आचार्य विवादमा परेपछि उनी एक वर्षे कार्यकाल नै पूरा नगरी प्रहरी मुख्यालय तानिएका थिए । तर, सरुवा भएर गएका डीआईजी उपाध्यायले पनि नाकाबाट रकम उठाउन र अन्य विवादास्पद काम गर्न थालेपछि प्रहरी कर्मचारीले नै गुनासो गरेका हुन् ।
लुम्बिनीमा भैरहवा, कृष्णनगर, नेपालगन्ज जस्ता प्रमुख नाकाहरु भएका सहर छन् भने परासीलगायतका साना र रणनीतिक हिसाबले संवेदनशील नाका पनि छन् । तर, यी नाकाबाट चोरी निकासी रोक्ने, प्रदेशकै शान्ति सुरक्षालाई बलियो बनाउने गरी काम गर्नुपर्नेमा डीआईजी उपाध्यायले आफ्नो स्वार्थ अनुकूल काम गर्न थालेको उच्च स्रोतले जानकारी दिएको छ ।
उनी पहिले पूर्वी नवलपरासीको प्रहरी प्रमुख पनि भएका थिए ।
हाल उनले प्रहरी सहायक निरीक्षक पुरन केवट, प्रहरी सहायक हवल्दार प्रमोद यादव, प्रहरी जवान भक्त बहादुर राना, प्रहरी हवल्दार तेजबहादुर कुँवर तथा कपिलवस्तु, रुपन्देही र नवलपरासीका टोलीहरुलाई घुमुवाको रुपमा खटाएका छन् । उल्लेखित प्रहरी कर्मचारीहरु पनि विगतमा विभिन्नमा विवादमा पर्दै आएका थिए ।
प्रहरी स्रोतका अनुसार उपाध्यायको निकटतम रहेर सहकार्य गर्नेमा गृहमन्त्री बालकृष्ण खाँणकै भाइ रामकृष्ण खाण पनि छन् । उपाध्यायले खाणसँगै मिलेर विगतमा विवादमा रहेका घुमुवाहरुको प्रयोग गरी रकम उठाउँदै आएको स्रोतको भनाइ छ । यसबारेमा प्रहरी मुख्यालले आन्तरिक छानबिन तयारी गरे पनि औपचारिक जानकारी भने
दिइसकेको छैन । यस विषयमा लुम्बिनी प्रदेशका डिआईजी उपाध्यकको डिआईजीले बोक्ने 9857084444 नम्बरमा फोन गर्दा सम्पर्क हुन सकिन । पर्दाफासबाट
