काठमाडौं । राष्ट्रपतिको निर्वाचन फागुन २० पछि सर्ने सम्भावना बढेको छ । संवैधानिक व्यवस्थाअनुसार माघको अन्तिमसम्म राष्ट्रपतिको निर्वाचन भइसक्नुपर्ने हो ।
तर नयाँ निर्वाचित राष्ट्रपतिको व्यवस्थापन र पुरानोको बिदाइमा समस्या पर्ने देखिएकाले कानुन नै संशोधन गरेर चुनाव सार्ने तयारी गरिएको हो । राष्ट्रपतिको निर्वाचन सार्ने विषयमा सत्तारुढ दल र निर्वाचन आयोगबीच छलफल भइरहेको स्रोतले जानकारी दियो ।
राष्ट्रपति विद्यादेवी भण्डारीको कार्यकाल फागुनको २८ मा समाप्त हुँदैछ । एक महिनाअघि चुनाव गरिसक्ने व्यवस्थाअनुसार माघको अन्तिमसम्ममा गर्ने सरकारको तयारी थियो ।माघको अन्तिममा राष्ट्रियसभाको खाली रहेको स्थानमा चुनावको तयारी पनि गरिएकाले फागुनमा सार्ने तयारी गरिएको स्रोतले बतायो ।
