ABC (क्राईमबिट)
चितवन । नेपाल प्रहरी शिक्षालय भरतपुरमा प्रशिक्षणरत प्र.स.नि. आधारभुत तालिम २-१७८ औं समूहका प्रशिक्षार्थीहरुमा रहेको आन्तरिक प्रतिभालाई प्रस्फुटित गराई उनीहरुले आर्जन गर्ने ज्ञानको दाँयरालाई अझ व्यापक बनाउने बढाउने उद्देश्यले आज सरस्वती पूजा 
(वसन्त पंचमी) को पावन अवसरमा यस शिक्षालयका निर्देशक प्रहरी नायव महानिरीक्षक दुर्गा सिंहज्यूद्वारा ”नव प्रवर्तनीय कार्य-२०७९” को एक समारोहबिच समुद्घाटन गर्नु भयो । यस कार्यक्रम अन्तर्गत प्रशिक्षार्थीहरुलाई ७ वटा सदनमा विभाजन गरी जम्मा १२ वटा विधा (चित्रकला, फोटोग्राफी, फुटबल, भलिबल, बास्केटबल, कबड्डी, वक्तृत्व कला, हाजिरी जवाफ, कविता वाचन, पुस्तक समिक्षा, नृत्य र गायन) हरुमा प्रतिस्पर्धात्मक खेल तथा ईभेन्टको आयोजना हुनेछ ।
यसरी ७ वटै सदनका प्रशिक्षार्थीहरुले प्रतिश्पर्धात्मक आधारमा भाग लिने १२ बिधाका खेल तथा विभिन्न ईभेन्टहरुमा प्राप्त गरेको अंकको आधारमा बिजेता सदनको चयन गरी बिजेताहरुलाई ट्रफी तथा प्रशंसा पत्र प्रदान गरिनेछ ।
आजको यस भव्य कार्यक्रममा नवप्रवर्तनीय कार्य -२०७९ को उद्देश्य महत्व र ईभेन्ट संचालनका बिषयमा शिक्षालयका उप-निर्देशक प्र.उ. प्रकाश मल्लले बताउनु भएको थियो । कार्यक्रमको समुद्घाटन गर्दै निर्देशक प्र.ना.म.नि.दुर्गा सिंहज्यूले प्रशिक्षार्थीहरुलाई हरेक खेल र ईभेन्टहरुमा दिलोज्यान लगाएर सहभागीता हुनको निमित्त निर्देशन तथा शुभकामना दिदै शिक्षालय भित्र संचालन हुने प्रशिक्षणका हरेक गतिविधिमा आफू लगायत शिक्षालय परिवार प्रशिक्षार्थीहरु संगसंगै हुने कुरामा आश्वस्त पार्नु भएको थियो ।
