(ABC-Sanchar) काठमाडौं । प्रधानमन्त्री पुष्पकमल दाहाल प्रचण्डले राष्ट्रिय स्वतन्त्र पार्टीलाई गृह मन्त्रालय दिन नसकिने बताएका छन् ।
मंगलबार बिहानको भेटवार्तामा रास्वपाका सभापति रवि लामिछानले गृह मन्त्री बनाउन आग्रह गरेपछि प्रधानमन्त्री प्रचण्डले सो जवाफ दिएका हुन् । बालुवाटार स्रोतका अनुसार प्रचण्डले रविलाई नभई उनको पार्टी रास्वपालाई नै गृह मन्त्रालय नदिने बताएका छन् ।
पुस ११ गते प्रचण्ड नेतृत्वको सरकारमा गृह मन्त्रीको शपथ खाएका लामिछानेको शुक्रबार नागरिकता सर्वोच्चले अवैध ठहर गरेपछि पदमुक्त भएका थिए । तर, आइतबार पुनः नेपाली नागरिकता लिएसँगै उनी गैरसांसदका रुपमा पुरानै जिम्मेवारीमा फर्किने दाउमा छन् ।
लामिछानेको नागरिकता तथा राहदनी विवादका कारण नेकपा माओवादी केन्द्रले गृह मन्त्रालय आफैंसँग राख्न खोजेको छ । तर प्रधानमन्त्री प्रचण्डमाथि सत्ता साझेदार दल नेकपा एमाले र रास्वपाबाट गृह मन्त्रालय पुनः रास्वपालाई नै दिनुपर्ने दबाव छ ।
