(तेज वली) दाङ । यात्रुहरूको आरामदायी यात्राका लागि त्रिशिद्धेश्वरी राप्ती यातायात प्रालिले दाङमा पहिलो पटक सुतेर यात्रा गर्न सकिने एयर सस्पेन्सन सिल्पर एसी बस सञ्चालनमा ल्याएको प्रालिका अध्यक्ष सुरेश हमालले जानकारी दिनुभयो । प्रविधिको विकास र यात्रुको सुविधालाई मध्यनजर गर्दै ल्याइएको ३६ सिटे बसमा ४ वटा सिटमा सुत्न मिल्ने छ ।
बसेर यात्रा गर्नका लागि १८ सय र सुतेर यात्रा गर्नका लागि २ हजार रुपैयाँ भाडा लाग्ने छ । बसमा चढ्ने वित्तिकै यात्रुले एक बोतल पानी र कुकिज पनि प्राप्त गर्ने छ । प्रत्येक दिन एउटा मात्र बस तुलसीपुरबाट काठमाण्डौका लागि छुट्ने छ । दाङको तुलसीपुरबाट बेलुकी साढे पाँच बजे र काठमाण्डौबाट पौने ६ बजे एयर सस्पेन्सन सिल्पर एसी बस छुट्ने छ । प्रालिले तुलसीपुरमा पत्रकार सम्मेलनको आयोजना गरेर यस अघि ब्लुस्काई, सेभेन स्टार सञ्चालनमा ल्याइसकेको र अहिले पहिलो चरणमा सस्पेन्सन ४ वटा बस ल्याइएको छ ।
सो अवसरमा कार्यक्रमका प्रमुख अथिति नेपाल पत्रकार महासंघ दाङका अध्यक्ष दुर्गालाल केसीले सुविधा सम्पन्न आरामदायी बस सञ्चालनमा ल्याउनु गौरवको कुरा भएको बताउँदै यात्रुमैत्री व्यवहारका लागि ध्यान दिन आग्रह गर्नुभयो । कार्यक्रमको सहजीकरण प्रालिका सल्लाहकार शरद रेग्मीले गर्नु भएको थियो । प्रशासनिक सचिव प्रकाश भट्टले विषयवस्तु माथि प्रकाश पारेको पत्रकार सम्मेलनमा स्वागत पूर्व सचिव नारायण प्रसाद न्यौपानेले गर्नुभएको थियो ।
