(ABC-Sanchar) काठमाडौं । नेकपा एमालेका अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको वर्तमान सरकारलाई सुझाव दिनुको कुनै औचित्य नरहेको बताएका छन् । भैंसीको अगाडि बीन बजाउनु र वर्तमान सरकारलाई सुझाव दिनु उस्तै रहेकोसमेत उनले टिप्पणी गरे ।
काठमाडौंको भृकुटीमण्डपमा शुक्रबार आयोजित एक कार्यक्रममा बोल्दै पूर्वप्रधानमन्त्रीसमेत रहेका ओलीले सरकारले आफूहरुले दिएको सुझावको मतलब नै नराख्ने बताएका हुन् ।
अध्यक्ष ओलीले भने, ‘हुन त अहिलेको सरकारलाई सुझाव दिने भनेको हिन्दी उखान, भैँसके आगे बीन बझाए, भैँस रहे पगराए भने जस्तै छ । भैँसीको अगाडि बीन बजायो भने उग्राएर बस्छ । त्यो केही मतलब राख्दैन ।’ उनले अहिलेको सरकारलाई सुझाव दिने कुरा र हिजो लुटेर जुत्ता लगाउनु र आज भन्सारतिरबाट लुट फस्र्योट गर्नु एउटै भएको समेत बताए ।
ओलीले भने, ‘५०/५३ प्रतिशत त लुटेकै छ नि त । स्वदेशी उत्पादनले संरक्षण पाएको छैन अहिलेसम्म । त्यसलाईं संरक्षण दिनुपर्छ । त्यसका लागि कच्चा पदार्थको सहज र सस्तोमा पाउने अवस्था र यसमाथि भ्रष्ट हस्तक्षेप नेपाली उत्पादनमाथिको भ्रष्ट हस्तक्षेप त्यो व्यापारिक क्षेत्र र सरकारी क्षेत्र भएको छ । त्यसलाई रोक्नु पर्छ ।’
