ABC (क्राईमबिट) सर्लाही । घरमा लुकाएर राखिएको हतियार बरामद भए पनि घरका सबै जना फरार रहेको प्रहरीले जनाएको छ । मलंगवा नगरपालिका १ स्थित अवध रायको घरबाट एक थान सेमी अटोमेटिक पेस्तोल, एक थान खुँडा र एउटा चक्कु बरामद गरिएको हो ।
घरमा लुकाएर राखेको अवस्थामा हतियार बरामद भएको प्रहरीले जनाएको छ । रायको घरबाट ईन्जिन नम्बर केरमेट भएको र नम्बरसमेत नराखेको अवस्थामा १ सय ५० सीसीको कालो रङको पल्सर मोटरसाइकल समेत बरामद भएको जिल्ला प्रहरी कार्यालयले जनाएको छ ।
अवधका दुई छोरा ईन्द्रजित र रंजित सीमामा अवैध काम गर्ने गरेको खुलेको प्रहरी उपरीक्षक नरेशराज सुवेदीले बताए । उनले शंकाको घेरामा रहेका उनीहरूको टोलमा प्रहरी पुग्दा घरका सबै जना फरार भएको र फरार सबैको खोजीकार्य भइरहेको बताए ।
प्रहरी उपरीक्षक सुवेदीका अनुसार सीमामा तस्करी गर्न, सर्वसाधारणलाई तर्साउन र अन्य आपराधिक कार्य गर्न हतियारको उपयोग गरेको हुनसक्ने आंकलन छ ।
