(ABCSanchar) बुटवल । नेकपा एमालेका सचिव तथा सांसद टोपबहादुर रायमाझी सम्पर्कविहीन भएका छन्। अर्घाखाँचीबाट काठमाडौं जान्छु भनी हिँडेका रायमाझी काठमाडौं नगई सम्पर्क विहीन भएका हुन् ।
बुधबार भैरहवा विमानस्थलबाट सभामुख देवराज घिमिरेसँगै काठमाडौं आउन ठीक्क परेका टोपबहादुर विमानस्थलनै नगइ सम्पर्कबाट बाहिरिएका हुन् । नक्कली भुटानी शरणार्थी प्रकरणमा मुछिएका रायमााझीविरुद्ध पक्राउ पुर्जी जारी भइसकेकाले उनलाई प्रहरीले काठमाडौंमा उत्रिनेबित्तिकै समात्ने तयारी गरेको थियो । उक्त सूचना पाएसँगै उनी सम्पर्कविहीन भए । हाल उनको मोबाइल फोन पनि अफ छ ।
बुधबार टोपबहादुर सभामुख देवराज घिमिरेसँगै अर्घाखाँचीको सुपदेउराली मन्दिरमा दर्शन गर्न पनि पुगेका थिए । उनले नक्कली शरणार्थी प्रकरणमा आफ्नो संलग्नता नरहेको बताउँदै कानुनलाई सहयोग गर्ने वचन सन्धिखर्कमा पत्रकारसँगको कुराकानीमा उल्लेख गरेका थिए ।
नेपालीलाई नक्कली शरणार्थी बनाएर अमेरिका पठाइदिन्छु भनी ५ करोडभन्दा बढी ठग्ने गिरोहसँग सांसद टोपबहादुर र छोरा सन्दीपको नाम मुछिएको छ । सन्दीपलाई बुधबार नै बुटवलबाट प्रहरीले पक्राउ गरिसकेको छ । छोरा सन्दीप रायमाझीलाई प्रहरीले पक्राउ गरेपछि उनले अन्तिम समयमा विमानको टिकट क्यान्सिल गरेका थिए ।
हालसम्म नक्कली शरणार्थी बनाएर अमेरिका पठाउन खोज्ने ठगी प्रकरणमा केशव दुलाल र सानु भण्डारी पूर्वगृहमन्त्री रामबहादुर थापा बादलका सुरक्षा सल्लाहकार इन्द्रजित राई तत्कालीन गृहसचिव टेकनारायण पाण्डे लगायत ८ जना पक्राउ परिसकेका छन् ।
साेही प्रकरणमा पूर्वगृहमन्त्री थापाका छोरा प्रतीक थपा र सुरक्षा सल्लाहकार राईका छोरा निरज राईविरुद्ध पनि पक्राउ पुर्जी जारी भइसकेको छ । उनीहरु हाल फरार छन् ।
