ABC (क्राईमबिट)
रोल्पा । प्रहरी र यातायात व्यवसायीबीच विवाद हुँदा रोल्पाबाट लामो दूरीमा चल्ने गाडी रोकिएका छन् । शुक्रबार दिउँसो विवाद हुँदा काठमाडौंका लागि चल्ने गाडी रोकिएका हुन् । लिवाङस्थित मुख्य बजारमा प्रहरीले बस पार्किङ गर्न नदिएपछि यातायात व्यवसायी समिति रुष्ट बनेको हो ।
जलजला यातायात समितिका कर्मचारीमाथि प्रहरी प्रमुखले गाली गरेको भन्दै समितिले बीच सडकमै बस रोकेर विरोध जनाएका छन् । समिति सम्बद्ध कर्मचारीले गाडी राख्ने विषयमा छलफल गरिरहेकाले बेला प्रहरी प्रमुख प्रनाउ श्याम सारुमगरले अपशब्द बोलेको आरोप लगाएका छन् ।
विरोधस्वरुप लिवाङदेखि काठमाडौंका लागि चल्ने कम्तीमा ३ वटा रात्रिकालीन गाडीबीच सडकमा रोकिएका छन् । विवाद दिउँसो ३ बजेदेखि भएको हो । बसपार्क निश्चित नभएकाले यातायात समितिले टुँडिखेल र सार्वजनिक स्थानमै गाडी पार्किङ गर्ने गरेका छन् ।
शुक्रबार बिहान स्थानीय प्रशासन कार्यालयको संयोजनमा बसेको सर्वदलीय बैठकले सार्वजनिक स्थानमा गाडी नराख्ने निर्णय गरेको थियो । नेकपाका नेता जेबी आक्रोशका अनुसार प्रमुख जिल्ला अधिकारी परमानन्द घिमिरेले सर्वदलीय बैठकमा विविध विषयसँगै गाडी पार्किङ गर्ने सवालमा प्रस्ताव गरेका थिए । विवाद मिलाउन प्रहरी कार्यालयले प्रयास थालेको छ । समितिका पदाधिकारीको उपस्थितिमा प्रहरीसँग वार्ता थाल्ने समितिले जनाएको छ ।
