(सागर थापा)
दाङ । आधुनिक समाजमा जन्म दिन तडक भडकका साथ मनाउने संस्कारको विकास भईरहँदा यहि समाजका केही त्यस्ता व्यक्तिहरुले भने आफ्नो जन्म दिनलाई केही उदाहरणीय र सार्थक सेवाभावले मनाउने गरेका छन् । सामाजिक संस्कारको खडेरी परिरहेको हाम्रो समाजमा अहिले पनि केही त्यस्ता यूवाहरु छन् ।
जुन समाजका लागि उदाहरणीय पात्रका रुपमा स्थापित हुदैछन् । आफ्नो विलासी जीवनशैलीका कारण आमाबाबु समेतलाई वृद्धाआश्रममा राखेर व्यस्त जीवन जिउनेहरुका लागि पनि ती समाजका लागि अहोरात्र खटिने युवाहरु प्रेरणाका पात्र बन्ने गरेका छन् । दाङको मानव सेवा आश्रममा काम गर्ने युवाहरु मात्रै होईन, त्यहाँ सेवा गर्न जाने र आश्रममा आश्रित बुबाआमा तथा दिदीबहिनी र दाजुभाईहरुसँगै आफ्नो जन्म दिन मनाउनेहरु पनि बढ्दै गएको छ ।
दाङ तुलसीपुर १८ निवासी सक्रिय संचारकर्मी सागर रोकाले आफ्नो जन्मदिनको सुभ अवसर पारेर मानवसेवा आश्रम दाङ शाखामा गएर आफ्नो २७ औ जन्म दिनमा खाद्यान्न एवं फलफूल वितरण गरि मनाएका छन् ।
