ABC (क्राईमबिट)
बारा । सर्लाहीको सुविधा बचत तथा ऋण सहकारी संस्थाका अध्यक्ष बचतकर्ताको करोडौँ रकम हिनामिना गरी फरार भएका छन् । जिल्लाको सदरमुकाम मलंगवास्थित सहकारीका अध्यक्ष ईश्वर गुप्ता बचतकर्ताको २४ करोडभन्दा बढी रकम हिनामिना गरेर फरार भएको बुझिएको छ ।
सहकारीका अध्यक्ष नै फरार भएपछि हाल त्यहाँ कार्यरत चार जना कर्मचारीलाई प्रहरीले नियन्त्रणमा लिएको छ । प्रहरीले सहकारीका प्रबन्धक दीपकलाल अमात्य, कर्मचारीहरू निर्मल श्रेष्ठ, उमेश अधिकारी र कामेश्वर सिंहलाई पक्राउ गरी थुनामा राखेको हो । बचतकर्ताको रकम हिनामिना गर्ने कार्यमा उनीहरूको पनि संलग्न रहेको आशङ्का गरिएको छ ।
हाल फरार रहेका सहकारीका अध्यक्ष गुप्ताको खोज कार्य भइरहेको सर्लाही प्रहरीका प्रवक्ता प्रहरी नायव उपरीक्षक (डिएसपी) दीपेन्द्र पञ्जियारले जानकारी दिए । उनका अनुसार गुप्ताले सहकारीबाट रकम लिनका लागि सञ्चालक समितिलाई जानकारी गराउनु नपर्ने नियम साधारण सभाबाट पास गराएका थिए । सोही अनुसार उनले सहकारीको ठूलो रकम हिनामिना गरेको प्रारम्भिक अनुसन्धानबाट खुलेको छ ।
गुप्ता दुई कार्यकाल उद्योग वाणिज्य सङ्घ मलंगवाका अध्यक्षसमेत भइसकेका व्यक्ति हुन् । हाल सहकारीबाट बचत फिर्ता पाउन बाँकी रहेको बचतकर्ताको बिचल्लीमा परेका छन् । त्यस्तै, अध्यक्षले गरेको गल्तीका कारण बजारमा खटिएका सहकारीका अभिकर्ताहरू थप मर्कामा परेका छन् । उनीहरूलाई दिनहुँ बचतकर्ताले बचत फिर्ता गर्न दबाब दिइरहेका छन् ।
