ABC (क्राईमबिट)
रौतहट । जिल्लाको कटहरी नगरपालिका – ५ मा छुरा प्रहार गरी स्थानीय २५ वर्षीय युवक सनिलराय यादवको मृत्यु भएको हो ।
शुक्रवार राती कारब ८ बजे दुई समूहबिच भइरहेको विवादका क्रममा अर्को समूहले प्रहार गरेको छुरा यादवको देब्रे कोखामा लागेको थियो ।
छुरा प्रहारबाट अचेत बनेका यादवलाई उपचारका लागि स्थानीयले प्राथमिक स्वास्थ्य केन्द्र कटहरिया लगेको थियो । त्यहाँ उनलाई चिकित्सकले मृत घोषणा गरेको प्रहरीले जनाएको छ ।
प्रहरीका अनुसार घटना अघि यादवका दाजुभाइ र अर्को पक्षबिच विवाद भएको थियो । सोही क्रममा भएको छुरा प्रहारबाट यादवको मृत्यु भएको हो ।
यद्यपि रौतहटका प्रहरी प्रमुख प्रहरी उपरीक्षक (एसपी) महेन्द्र श्रेष्ठले यादवमाथि छुरा प्रहार गर्नुको कारण अहिलेसम्म पनि नखुलेको बताएका छन् । एसपी श्रेष्ठले घटनामा संलग्न केही व्यक्तिलाई नियन्त्रणमा लिएर अनुसन्धान भइरहेको बताए ।
स्रोतका अनुसार प्रहरीले छुरा प्रहार गरेको आरोपमा बद्री साह सोनार र उनका काका किसन साहलाई पक्राउ गरेको छ । यद्यपि यसको पुष्टि हुन सकेको छैन ।
