ABC (क्राईमबिट)
दाङ । घोराही प्रहरी अतिरिक्त महानिरीक्षक (एआईजी) सन्दीप भण्डारीले प्रहरीको शुद्धता जाँच गर्न नागरिक सुनुवाइ हुनुपर्ने बताउनुभएको छ ।
राष्ट्रिय प्रहरी प्रशिक्षण प्रतिष्ठान महाराजगञ्जका कार्यकारी निर्देशक समेत रहनुभएका भण्डारी प्रदेश दौडाहाका क्रममा दाङ आउनुभएको हो । सोही अवसरमा जिल्ला प्रहरी कार्यालय दाङले पत्रकार तथा उद्योगी व्यवसायीसँग राखेको भेटघाटमा एआईजी भण्डारीले प्रहरीको प्रत्यक्ष अडिट हुनुपर्ने र त्यसको जिम्मा जनतालाई दिनुपर्ने बताउनुभयो । प्रहरीको बारेमा पनि नागरिक सुनुवाइ गर्न भनिएको उहाँले बताउनुभयो ।
‘प्रहरी आफै शुद्ध हुनुपर्छ । प्रत्यक्ष अडिट हुनुपर्छ । पब्लिकले गर्छ नि अडिट’– उहाँले भन्नुभयो– ‘हामीले नागरिक सुनुवाइ गर भनेका छौं । इलाका होस्, जिल्ला होस्, सबैतिर नागरिक सुनुवाइ हुनुपर्छ । प्रहरीसँग जोडिएका कुराहरु खुल्लम खुला भनून् नागरिकले ।’ उहाँले जनतासँग आँखामा आँखा जुधाएर बोल्न सक्ने प्रहरी हुनुपर्ने बताउनुभयो ।
‘यस पटक हामीलाई काम गर्न अनुकूल बातावरण छ । आर्थिक अनुशासन र गैरकानुनी क्रियाकलापमा कसैबाट प्रेसर छैन । खुल्लमखुला कानुनको पालना गर्न सकिन्छ’– उहाँले भन्नुभयो– ‘छाती फुलाएर काम गर्नुपर्छ । भ्रष्टाचारमा हाम्रो शून्य सहनशीलता हो । यसमा गृह प्रशासनबाट पनि फूलली सपोर्ट छ । सबै प्रहरीले यसै अनुरुप कानुन कार्यान्वयनमा लाग्नुस् ।’ अहिले प्रहरीभित्रका सबै गतिविधिमा पारदर्शिता अपनाएको बताउँदै उहाँले हरेक नागरिकले पनि अधिकारसँगै कर्तव्य पनि पालना गर्नुपर्नेमा जोड दिनुभयो । दाङबाट नदीजन्य पदार्थका गतिविधिका बढी गुनासा आएको बताउँदै उहाँले कुनै पनि दबाबमा गैरकानुनी काम नेपाल प्रहरीबाट नहुने प्रतिबद्धता जनाउनुभयो ।
‘प्रहरीले एक्लै काम गर्न सक्दैन । समाजको सहयोगमै समाजमा शान्ति सुरक्षा, अमनचैन राख्न प्रहरी सक्षम हुन्छ । प्रहरीलाई हरेक नागरिकको सहयोग चाहिन्छ । नागरिकले कानुनको सहयोग गर्नु कर्तब्य पनि हो’– उहाँले भन्नुभयो– ‘प्रहरी एक्लैको काम छैन । प्रहरीलाई सुरक्षा चाहिन्छ । समाजको सहयोग चाहिन्छ, आड भरोसा चाहिन्छ । हामीले समुदाय प्रहरी साझेदारीको कुरा यस कारण नै गरेका छौं ।’ उहाँले समुदाय प्रहरी सेवालाई प्रभावकारी बनाउने, लागूऔषध नियन्त्रणमा प्रभावकारी कदम चाल्ने तथा सचेतनाका कार्यक्रम तल्लो तहसम्मै लैजानुपर्ने, आत्महत्या रोकथामका कार्यक्रम प्रभावकारी बनाउनुपर्ने तथा ट्राफिक सचेतनाका कार्यक्रम पनि तल्लो तहसम्मै लैजानुपर्ने बताउनुभयो ।
