(ABC-Sanchar)
बाजुरा । बुढीगङ्गा नगरपालिका १० बदेडावासी दसैँ कसरी मनाउने भन्ने चिन्तामा रहेका छन् । यहाँका अधिकांश स्थानीय रोजगारीका लागि भारतमा जाने गर्दछन् । प्रत्येक वर्ष दसैँतिहार मनाउन उताबाट भारु रुपियाँ पठाउने गर्दछन् ।
असोजको दोस्रो सातादेखि गाउँमा कतै भारु रुपियाँ नचलेपछि बदेडावासीलाई यो वर्षको दशैँतिहार कसरी मनाउने भन्ने चिन्ता परेको हो ।
गाउँमा रोजगार छैन । घरपरिवार पाल्नकै लागि श्रीमान् भारतमा जानु भएको छ । श्रीमानले दशैँतिहार मनाउनका लागि भारतबाट आएकाहरूको हातमा भारु पैसा पठाएको छ, तर यता त्यो रुपियाँ कतै नचल्ने भएपछि यो वर्षको दशैँतिहार कसरी मनाउने भन्ने चिन्ता लागेको स्थानीय सिता विकले बताउनुभयो ।
उहाँले भन्नुभयो, “यता बैङ्क, आइएमी धेरै टाढा छन् । फेरि आफ्नो नाममा खाता पनि खोलेको छैन । श्रीमानले पनि भारतबाटदेखि गाउँमा आउनेको हातमा पैसा दिएको र अहिले त्यो पैसा कतै नसाटिने भए पनि दसैँ कसरी मनाउने भन्ने चिन्तामा लागेको बताउनुभयो ।’’
बाजुराका नौ वटै स्थानीय निकायका अधिकांश स्थानीयहरू भारतको विभिन्न ठाउँमा रोजगारी गर्दै आएका छन् ।
उनीहरू त्यहाँ नौकरी गरी गाउँमा घरपरिवार पाल्ने गर्दछन् । सधैँ झैँ यो वर्षमा पनि दशैँतिहार मनाउन उनीहरूले घरमा पैसा पठाएका छन् । तर यता त्यो पैसा भने कतै नचल्ने भएपछि उनीहरूको घरपरिवारलाई यो वर्षको दशैँतिहार कसरी बनाउने भन्ने चिन्ता लागेको छ ।
बैङ्क तथा आइएमीको पहुँच भएकाहरूलाई उताबाट सिधै पैसा आफन्तको नाउमा राख्न सहज भए पनि त्यो सेवा सुविधा नभएकाहरूलाई भने भारु पैसाले निकै समस्या गरेको विकले बताउनुभयो ।
भदौको पहिलो हप्तादेखि नै भारु पैसा साट्न समस्या आएको हो । अहिले साहुले भारु पैसा नल्याउनु भने पनि भारु साट्न समस्या भएको बुढीगङ्गा नगरपालिका –१० स्थानीय व्यापारी मनबहादुर सार्कीले बताउनुभयो ।
उहाँले भन्नुभयो, “भारतमा बसेका घरपरिवारलाई यता मैले सधैँ रासनपानी दिने गरेको छु । उताबाट उनीहरूले पनि मलाई महिना महिनामा पैसा दिने गरेको छन् । तर यती बेला भने भारु पैसा कुनै व्यापारीले लिन नमानेपछि साट्न निकै समस्या भएको हो ।’’
भारु बन्द भएको सुन्दा सुन्दै ३०–४० हजार रुपियाँ समातेको थियो । अहिले त्यो रुपियाँ पनि साट्न निकै समस्या भएको सार्कीले बताउनुभयो ।
बाजुराका अधिकांश व्यापारीहरूले भारु नोट नलिएपनि केही व्यक्तिले भने १० प्रतिशत रुपियाँ काटेर भारु चलाउने गरेको बुढीगङ्गा नगरपालिका–२ बल्देका व्यापारी बलबहादुर थापाले बताउनुभयो ।
उहाँले भन्नुभयो, “बाजुराका अधिकांश स्थानीयको भारतबाट नौकरी गरेर नेपालका परिवार पाल्नुपरेको छ । उनीहरूले पठाएको त्यो पैसा गाउँमा कतै नचल्दा अहिले उनीहरूलाई समस्यामाथि समस्या आएको बताउनुभयो ।
दसैँको बेलामा सबै भारु ल्याएर सामानका लागि पसलमा आउने गरेका छन् । यता भारु नोट बन्द हुन थालेपछि व्यापार व्यवसाय गर्न निकै सकस भएको थापाले बताउनुभयो ।
भारु पैसा जम्मा गर्न नलिएपनि उताबाट पठाएको पैसा भने दिन मिल्ले बाजुराका बैङ्कले जनाएको छ ।
यता भारतबाट सोझै खातामा पैसा पठाउन यता त्यो रुपियाँको नेपाली रुपियाँ दिन सकिने सिद्धार्थ बैङ्कले जनाएको छ ।
तर यता भारु पैसा साट्न वा जम्मा गर्न आएपछि भने त्यो पैसा भने बैङ्कले नबुझ्ने गरेको सिद्धार्थ बैङ्कका कर्मचारी अर्जुनसिंह ऐरीले बताउनुभयो ।
