(ABC-Sanchar)
काठमाडौं । इजरायली सेनाले आइतवार एक विज्ञप्तिमा भनेअनुसार उसका सेनाहरूले नजिकको लडाईमा “आतंकवादीहरूलाई हटाइरहेका छन्” र इजरायली विमानहरूले गाजा पट्टीमा हमासको पूर्वाधार, हतियार डिपो, अवलोकन चौकी र कमाण्ड र नियन्त्रण केन्द्रहरूलाई निशाना बनाएका थिए।
आइडीएफले भन्यो, “हिजो राती इजरायली सैनिकहरूले हमासको सैन्य कमाण्ड कम्पाउन्डमा आक्रमण गर्न विमानहरूलाई निर्देशन दिए। यो परिसरमा कमाण्ड र कन्ट्रोल सेन्टर, अवलोकन पोष्ट र अतिरिक्त पूर्वाधारहरू थिए।”
इजरायली सेनाका अनुसार हालसम्म ग्राउन्ड आर्मी, एयर फोर्स र नेवीको संयुक्त आक्रमणमा २५०० भन्दा बढी लक्ष्य ध्वस्त भइसकेको छ।
इजरायली सेनाले गाजा भित्र कारबाही गरिरहेका सैनिकहरूको तस्बिर पनि जारी गरेको छ।
यसैबीच हमासले टेलिग्राममा एक भिडियो पनि जारी गरेको छ जसमा हमास लडाकु र इजरायली सैनिकहरूबीच नजिकबाट गोली हानाहान भइरहेको छ। धेरै हमास लडाकुहरूले पनि ट्याङ्क विरोधी ग्रेनेडले ट्याङ्कमा आक्रमण गरेको देखिन्छ।
आइडीएफका अनुसार शनिबार गाजामा कारबाहीका क्रममा उसका चार सैनिकको मृत्यु भएको थियो।
इजरायली सेनाले गत हप्ता गाजामा स्थलगत कारबाही सुरु गरेको थियो। सेनाका अनुसार शनिबारसम्म स्थलगत अपरेशनमा मारिएका सैनिकको संख्या २८ पुगेको छ ।
गाजामा इजरायली आक्रमणमा मृत्यु हुनेको संख्या १० हजार नजिक पुगेको छ । भीषण लडाइका कारण उत्तरी गाजामा बसोबास गर्ने मानिसहरूलाई दक्षिणी क्षेत्रतर्फ जान कठिन भइरहेको छ । एजेन्सी
