एजेन्सी । संयुक्त राष्ट्रसंघिय शरणार्थी र आप्रवासन एजेन्सीहरूका अनुसार अन्डमान सागरमा गत साता डुंगा पल्टिँदा करिब २५० रोहिङ्ग्या र बंगलादेशी नागरिक बेपत्ता भएका छन्, जसमा बालबालिकाहरू पनि समावेश रहेको जनाइएको छ।
उनीहरु माछा मार्ने डुंगामार्फत बंगलादेशबाट मलेसिया जाँदै थियो। एजेन्सीहरूका अनुसार तीव्र हावा, खराब समुद्री अवस्था र डुंगामा अत्यधिक भीडका कारण यो डुबेको जनाइएको छ। बंगलादेश कोस्ट गार्डले एएफपी समाचार एजेन्सीलाई जानकारी दिँदै ९ अप्रिलमा आफ्नो एक जहाजले उक्त डुंगाबाट नौ जनालाई उद्धार गरेको बताएको छ। यद्यपि, डुंगा कहिले पल्टिएको हो भन्ने अझै स्पष्ट छैन।
रोहिङ्ग्या, जो म्यानमारको एक अल्पसंख्यक समुदाय हुन्, २०१७ मा भएको हिंसात्मक अभियानपछि ठूलो संख्यामा बंगलादेशतर्फ पलायन भएका थिए। म्यानमारमा, जहाँ बहुसंख्यक जनसंख्या बौद्ध धर्मावलम्बी छन्, रोहिङ्ग्या मुस्लिमहरूलाई नागरिकता दिइँदैन।
बंगलादेशमा कमजोर जीवन अवस्थाका कारण धेरै रोहिङ्ग्याहरू जोखिमपूर्ण समुद्री यात्रा गर्दै मलेसिया पुग्ने प्रयास गर्छन्, जसलाई उनीहरू सुरक्षित स्थानको रूपमा हेर्छन्। उद्धार गरिएका व्यक्तिहरूमध्ये एक रफीकुल इस्लामका अनुसार करिब ३६ घण्टासम्म समुद्रमा तैरिनुपरेको थियो। उनले डुंगाबाट तेल चुहिँदा आफूहरू पोलिएको पनि बताएका छन्।
४० वर्षीय रफीकुल इस्लामका अनुसार मलेसियामा रोजगारी पाउने आश्वासनले नै उनलाई यो खतरनाक यात्रा गर्न प्रेरित गरेको थियो। युएनएचसिआरका अनुसार यो दुःखद घटना लामो समयदेखिको विस्थापन र रोहिङ्ग्याका लागि दिगो समाधानको अभावमा भएको हो।
यस्ता डुङ्गाहरू प्रायः साना, भीडभाडयुक्त र आधारभूत सुविधा जस्तै सफा पानी र सरसफाइको अभावमा सञ्चालन हुन्छन्। धेरैजसो यात्रुहरू गन्तव्यसम्म पुग्नै सक्दैनन्Ù केही समुद्रमै ज्यान गुमाउँछन् भने केहीलाई पक्राउ वा फिर्ता पठाइन्छ।
कहिलेकाहीँ मलेसिया वा इन्डोनेसिया नजिक पुग्दा पनि उनीहरूलाई प्रवेश नदिइने गरेको छ। सन् २०२५ जनवरीमा मलेसियाले करिब ३०० शरणार्थी बोकेका दुई डुङ्गालाई खाना र पानी दिएपछि फर्काएको थियो।
बङ्गलादेशको कक्स बजारमा बस्दै आएका एक रोहिङ्ग्याले पहिले भनेका थिए, …मानिसहरू लडाइँमा मर्छन्, भोकले मर्छन्। त्यसैले केहीलाई यहाँ बिस्तारै मर्नुभन्दा समुद्रमा मर्नु राम्रो लाग्छ।Ú
मंगलबार जारी वक्तव्यमा संयुक्त राष्ट्रसंघीय निकायहरूले अन्तर्राष्ट्रिय समुदायलाई रोहिङ्ग्या शरणार्थी र उनीहरूलाई आश्रय दिइरहेका बङ्गलादेशका समुदायका लागि सहयोग निरन्तर राख्न आह्वान गरेका छन्।
उनीहरूले भनेका छन्, …बङ्गलादेशले नयाँ वर्ष मनाइरहँदा, यो दुःखद घटना म्यानमारमा विस्थापनका मूल कारण समाधान गर्न र रोहिङ्ग्याहरूलाई स्वेच्छाले, सुरक्षित र सम्मानपूर्वक घर फर्कन सक्ने वातावरण सिर्जना गर्न तत्काल पहल आवश्यक रहेको स्मरण गराउँछ।
