(ABC-Sanchar)
पर्सा । नेकपा एमालेका राष्ट्रिय अध्यक्ष केपी शर्मा ओली उपस्थितिमा आयोजित एक राजनीतिक कार्यक्रमका लागि विद्यालयमा बिदा दिइएको छ । पर्साको पोखरिया नगरपालिकामा नेकपा एमालेले आयोजना गरेको आम सभा तथा बृहत् पार्टी प्रवेश कार्यक्रमका लागि विद्यालयमा बिदा दिइएको बुझिएको हो ।
पोखरिया ४ स्थित श्री जिल्ला उच्चाङ्गल रामदेव कलवार माध्यमिक विद्यालय पोखरियामा मङ्गलवार बिदा दिएर एमालेले आम सभा तथा पार्टी प्रवेश कार्यक्रमको आयोजना गर्दा विद्यार्थीहरू पढ्न पाउनु पर्ने अधिकारबाट वञ्चित भएका छन् ।
कार्यक्रमलाई पूर्व प्रधानमन्त्री समेत रहेका केपी शर्मा ओली लगायत नेकपा एमालेका ठूलो नेताहरू योगेश भट्टराई, रघुवीर महासेठ लगायतले सम्बोधन गरेका थिए ।
पूर्व निर्धारित पार्टीको कार्यक्रमका कारण विद्यालयमा मङ्गलवार बिदा दिइएको थियो । विद्यालयहरूमा तिहार र छठ पर्वको बिदा मङ्सिर ४ गतेसम्म रहे पनि आम सभा र पार्टी प्रवेश कार्यक्रम कै कारण विद्यालयमा थप एक दिनका लागि बिदा दिइएको बुझिएको छ । कार्यक्रममा पोखरिया नगरपालिकाका मेयर प्रद्युम्न चौहान र उपमेयर रुवी ठाकुर पनि सहभागी थिए ।
विद्यालयलाई शान्ति क्षेत्र र राजनीतिक दलको कार्यक्रम निषेधित क्षेत्र घोषणा गरिए पनि शीर्ष दल र शीर्ष नेता नै सहभागी भएको कार्यक्रम आयोजना हुँदा विद्यार्थीहरू मार्कामा परेका हुन् ।
विद्यालयमा तिहार र छठको बिदा नै रहेको पोखरिया नगरपालिकाका मेयर प्रद्युम्न चौहानले दाबी गरे । तिहार र छठको बिदा मङ्सिर ४ गतेसम्म नै रहे पनि पार्टी कै कार्यक्रमका कारण एक दिन थप मङ्सिर ५ गते बिदा दिइएको भन्ने प्रश्नमा उनले त्यस्तो नभएको बताए ।
विद्यालय बन्द गरेर राजनीतिक दलको कार्यक्रम गर्नु उचित नभएको भनेर प्रश्न गर्दा उनले, ‘तपाईँहरूको काम नै यहीँ हो, भेटेर कुरा गर्नुहोला’ भन्दै फोन काटे ।
नगरपालिकाका शिक्षा शाखा प्रमुख विजय झाले पनि नगरपालिकाअन्तर्गतको सबै विद्यालयमा मङ्सिर ५ गतेसम्म बिदा दिइएको दाबी गरे । उनले छठ पर्वको भोली पल्ट विद्यालयमा विद्यार्थीहरूको उपस्थिति न्यून भएको कारण स्थानीय तहबाट थप एक दिन बिदा दिइएको बताए । श्री जिल्ला उच्चाङ्गल माविका प्रधानाध्यापक ओमप्रकाश रौनियारसँग सम्पर्क गर्न खोज्दा उनको फोन बन्द थियो ।
