(एबिसि संचार ) भेपमार्फत सुन तस्करी प्रकरणमा पक्राउ परेका प्रतिवादीलाई छुटाइदिने भन्दै रकम लिएको आरोपमा एक पत्रकार पक्राउ परेका छन् । पक्राउ पर्नेमा पत्रकार डिल्ली पाण्डे रहेका छन् । सीआइबी श्रोतका अनुसार भेपमार्फत् सुन तस्करी प्रकरणमा पक्राउ परेका नायब सुब्बा रेवन्त खड्कालाई थुनामुक्त गरिदिने भन्दै पत्रकार पाण्डेसहितको टोलीले करिब १ करोड रुपैयाँ ठगी गरेको आरोप लागेको छ । सीआइबीले पाण्डेसहित रितु राई र निरेश चौधरीलाई पक्राउ गरेको थियो । सीआइबी श्रोतका अनुसार पाण्डेको भूमिका रकमको बार्गेनिङ गर्ने विषयमा भन्दा पनि समन्वय गर्ने विषयमा देखिएको र पाण्डेले रितु राईसँग मात्रै कुराकानी तथा कारोबार गरेको पाइएको हो । सीआइबीले राई र चौधरीलाई यसअघि नै सार्वजनिक गरिसकेको छ । यद्यपि पाण्डेको भूमिका के हो भन्ने स्पष्ट नभएकाले सीआइबीले सार्वजनिक गरेको छैन ।पाण्डेले पनि ठगीमा आफ्नो कुनै संलग्नता नरहेको र रितु राईसँग लेनदेन भएकाले आफूले लिनुपर्ने रकम मात्रै आफूले लिएको बताएका छन् । राईले पाण्डेलाई २७ लाख रुपैयाँ दिएको देखिएको सीआइबी श्रोतले बतायो ।
सीआइबी श्रोतका अनुसार ठगीमा पाण्डेको संलग्नता हो कि होइन भन्ने विषयमा समेत अनुसन्धान भइरहेको छ । पाण्डेले लिएको रकम पक्राउ परेका प्रतिवादीलाई छुटाइदिने भनेर लिएका हुन् कि रितु राईसँगको आर्थिक कारोबार मात्रै हो भन्ने सम्बन्धमा समेत अनुसन्धान भइरहेको सीआइबीले जनाएको छ ।
भेपमार्फत् तस्करी भएको ९ किलो सुन प्रकरणमा भन्सार कार्यालयका सुब्बा रेवन्त खड्कालाई काठमाडौँ जिल्ला अदालतले पुर्पक्षका लागि थुनामा पठाएको थियो । पुर्पक्षका लागि थुनामा पुगेका खड्कालाई छुटाइदिने भन्दै भोजपुरकी रिता राईले रेवन्तका बुवामार्फत करिब १ करोड रुपैयाँ बुझेकी थिइन् । त्यही रकममध्ये २७ लाख रुपैयाँ पाण्डेले लिएको रितुले बयान दिएकी थिइन् । रितुकै बयानका आधारमा पाण्डेसमेत पक्राउ परेका हुन् ।(रास्स)
