(एबिसि संचार ) काठमाडौंबाट एक जना नक्कली डाक्टर पक्राउ परेका छन् ।धौलागिरी पोलिक्लिनिक चलाएर बसेका सम्बुद्ध भट्टाचार्यलाई काठमाडौं उपत्यका अपराध अनुसन्धान कार्यालयको टोलीले आइतबार पक्राउ गरेको हो । उनलाई आजै दिउँसो पत्रकार सम्मेलन गरेर सार्वजनिक गरिएको हो । उनी मोरङको विराटनगर उपमहानगरपालिकाका हुन् । टिचिङ अस्पतालमासमेत काम गरेको भन्दै उनले काठमाडौंका विभिन्न क्लिनिकमा उपचार गर्ने गरेको पाइएको अपराध अनुसन्धान कार्यकालका प्रवक्ता एसपी रवीन्द्र रेग्मीले बताए । उनको साथबाट त्रिवि शिक्षण अस्पतालको परिचयपत्र पनि बरामद भएको छ ।उनको साथबाट विभिन्न छापहरू र एक लाख ६५ हजार नगदसमेत बरामद गरिएको प्रहरीले जनाएको छ ।
उनले एमबीबीएस उत्तीर्ण गरेको प्रमाणपत्रदेखि लाइसेन्ससम्म नक्कली बनाएको पाइएको प्रहरीको भनाइ छ । उनले काठमाडौं उपत्यकाका विभिन्न फार्मेसीमा काम गर्दै आएको एसपी रेग्मीले बताए ।
प्रहरीका अनुसार उनले प्रतिव्यक्ति जाँच गरेको सात सय रुपैयाँ लिने गरेका थिए । धौलागिरि हिमाल पोलिक्लिनिक, विकियर पोलिक्लिनिक नक्साललगायतका पोलिक्लिनिकहरूमा कसन्सल्ट्यान्टको रुपमा काम गर्दै आएका थिए ।
उनले विकर पोलिक्लिनिकमा ६ सय ३० जनालाई जाँच गर्दै आएका थिए । ‘त्यहाँ उनले एक जनाको ७ सय ५० रुपैयाँ लिने गरेका रहेछन्’, एसपी रेग्मीले भने, ‘धौलागिरि पोलिक्लिनिकमा एक जनाको ५ सय रुपैयाँ लिने गरेका रहेछन् ।’
उनले विनाअनुमति मास्टर पाक्टिसनल नम्बर, एनएमसी नम्बर लगायतका प्रयोग गर्दै आएका थिए ।
उनले प्रहरीलाई चीनबाट एमबीबीएस गरेको बताएका छन् तर त्यसलाई प्रमाणित गर्ने कुनै पनि प्रमाणपत्र नभएको एसपी रेग्मीले बताए । ‘उसले प्रयोग गरेका सबै प्रमाणपत्रहरू नक्कली छन्,’ एसपी रेग्मीले भने ।(रास्स)
