(एबिसि संचार )
काठमाडौंबाट लुक्ला उडेको एयर डाइनेस्टीको हेलिकप्टरमा चरा ठोक्किएको छ । ७ नटिकल माइल उडेको ‘९एन–एएनए’ दर्ता नम्बरको उक्त हेलिकप्टरमा शुक्रबार बिहान चरा ठोक्किए पनि सकुशल काठमाडौं फर्काएर अवतरण भएको छ ।
चरा ठोक्किएपछि हेलिकप्टर तत्काल त्रिभुवन विमानस्थल फर्किएको थियो । हेलिकप्टर चालक तथा यात्रु सुरक्षित रहेको विमानस्थल प्रवक्ता सुवास झाले जानकारी दिए । उनका अनुसार बिहान सवा १० बजे हेलिकप्टरमा चरा ठोक्किएको हो ।
हेलिकप्टर ५ सिट क्षमताको थियोे । काठमाडौंबाट पूर्वतर्फ उड्दाउड्दै चरा ठोक्किएको थियो । काठमाडौं विमानस्थलमा चराका कारण उडान नियमितजसो प्रभावित बनिरहेको हुन्छ ।
आजै कतार एयरवेजको जहाज अवतरणका क्रममा अत्यधिक हावाको बेगका कारण ‘ओभरसुट’ (अवतरणका क्रममा धावनमार्ग नजिकैबाट पुनः उडान भर्नु) गर्नुपरेको छ ।
कतारको ६४६ जहाज दिउँसो साढे ४ बजे अवतरणका क्रममा ओभरसुट गर्नुपरेको हो । अधिक हावाको बेगका कारण जहाज ओभरसुट गरी पुनः अवतरण गरेको हो ।
पाइलटले जोखिम मोलेर अवतरण गराउनुको सट्टा जहाजलाई पुनः फन्को मारी सुरक्षित बनाउन ओभरसुट गर्छन् ।(रास्स)
