(ABC-Sanchar)
बर्दिया । अत्यधिक गर्मीले बालबालिकामा प्रत्यक्ष स्वास्थ्य असर देखिएको भन्दै गुलरिया नगरपालिकाका सबै विद्यालय थप छ दिनका लागि बन्द गर्ने निर्णय भएको छ । यसअघि जेठ १६ देखि १८ गतेसम्म विद्यालय बन्द गरिएको थियो ।
अत्यधिक गर्मी नरोकिएपछि आइतबारदेखि थप छ दिन विद्यालय बन्द गर्ने निर्णय गएको गुलरिया नगरपालिकाका शिक्षा शाखा प्रमुख सतिश यादवले बताए । सबै विद्यालय जेठ २५ गतेबाट सञ्चालनमा आउने उनले जनाए । थप गर्मी भए पुनः विद्यालय बन्द गरिने शिक्षा शाखा प्रमुख यादवले जनाए । उनले भने, ‘गर्मी बिदालाई वर्षायाममा दिँदै आएको बिदाबाट मिलान गरिने छ ।’
जिल्लामा दिउँसोको तापक्रम ४२ डिग्रीदेखि ४३ डिग्री सेल्सियससम्म पुग्ने गरेको छ । ‘तातो हावा लु र अत्यधिक गर्मीले घर बाहिर निस्कने अवस्था छैन,’ स्थानीय ६८ वर्षीय हरिराम लोधले भने । ‘दिउँसो घर बाहिर निस्के कहाँ ढल्ने हो जस्तो हुन्छ,’ उनले भने, ‘तीस वर्ष पछिको यो गर्मी अत्यधिक हो ।’
शुक्रबार बर्दियाको तापक्रम ४३ डिग्री पुगेको छ । दिउँसो अत्यधिक गर्मी र तातो लुले जिल्लाको जनजीवन प्रभावित बनाएको छ । गर्मीले अत्यावश्यक कामबाहेक मानिसहरु घर बाहिर निस्केका छैनन् । कार्यालयमा सेवाग्राही पनि न्यून देखिएका छन् । गर्मीको असर सबैभन्दा बढी दैनिक ज्याला/मजदुरी गरी जीविका धान्ने वर्ग प्रभावित भएका छन् ।
